తెలంగాణ మోడల్‌ స్కూల్‌లో ఘనంగా స్వాతంత్ర్య దినోత్సవ వేడుకలు

తెలంగాణ మోడల్‌ స్కూల్‌, మట్టంపల్లిలో 80వ స్వాతంత్ర్య దినోత్సవ వేడుకలు శనివారం ఘనంగా నిర్వహించారు. పాఠశాల ప్రిన్సిపాల్‌ బి. శంకర్‌ నాయక్‌ జాతీయ పతాకాన్ని ఆవిష్కరించి విద్యార్థులు, ఉపాధ్యాయులు, సిబ్బందికి స్వాతంత్ర్య దినోత్సవ శుభాకాంక్షలు తెలిపారు.ఈ సందర్భంగా ఆయన మాట్లాడుతూ.. మహాత్మాగాంధీ, నేతాజీ సుభాష్‌ చంద్రబోస్‌, సర్దార్‌ వల్లభభాయ్‌ పటేల్‌, డాక్టర్‌ బి.ఆర్‌. అంబేద్కర్‌, భగత్‌సింగ్‌, అల్లూరి సీతారామరాజు, కొమురం భీమ్‌ తదితర స్వాతంత్ర్య సమరయోధుల త్యాగాలను స్మరించుకోవాలన్నారు. వారు పాటించిన సత్యం, అహింస, సమానత్వం, ఐక్యత, దేశభక్తి వంటి విలువలను జీవితంలో ఆచరించడమే వారికి నిజమైన నివాళి అని పేర్కొన్నారు.విద్యార్థులు క్రమశిక్షణతో చదువుకోవడంతో పాటు తల్లిదండ్రులు, ఉపాధ్యాయులు, పెద్దలను గౌరవించాలని సూచించారు. పాఠశాల ఆస్తులను కాపాడటం, పరిసరాలను పరిశుభ్రంగా ఉంచడం, ఇతరులకు సహాయం చేయడం వంటి మంచి అలవాట్లను పెంపొందించుకోవాలన్నారు. రాజ్యాంగ విలువలైన న్యాయం, స్వేచ్ఛ, సమానత్వం, సౌభ్రాతృత్వాన్ని గౌరవిస్తూ కుల, మత, భాష, ప్రాంత భేదాలకు తావివ్వకుండా అందరినీ గౌరవించాలని పిలుపునిచ్చారు. ప్రకృతి, చెట్లు, జంతువులు, నీటి వనరులను సంరక్షించాలని, ప్లాస్టిక్‌ వినియోగాన్ని తగ్గించి పరిశుభ్రతను పాటించాలని సూచించారు. ఇతరుల విజయాలను అభినందిస్తూ, కష్టాల్లో ఉన్నవారికి అండగా నిలవాలని, కోపం కంటే సహనాన్ని, ద్వేషం కంటే మానవత్వాన్ని ఎంచుకోవాలని అన్నారు. ‘నేటి విద్యార్థులే రేపటి దేశ భవిష్యత్తు. విద్యతో జ్ఞానంతో పాటు మంచి వ్యక్తిత్వం, క్రమశిక్షణ, మానవత్వం పెంపొందించుకోవాలి. విజయవంతమైన వ్యక్తులుగా మాత్రమే కాకుండా మంచి మనుషులుగా, బాధ్యతాయుతమైన భారతీయులుగా ఎదగాలి’ అని ఆకాంక్షించారు. స్వాతంత్ర్య సమరయోధులు అందించిన స్వేచ్ఛను కాపాడుతూ భవిష్యత్‌ తరాలకు మెరుగైన భారతదేశాన్ని అందించడం ప్రతి ఒక్కరి బాధ్యత అని పేర్కొన్నారు.

కార్యక్రమంలో వైస్‌ ప్రిన్సిపాల్‌ సైదులు, అమ్మ ఆదర్శ పాఠశాల చైర్మన్‌ నిర్మల, విద్యార్థులు, ఉపాధ్యాయులు, బోధనేతర సిబ్బంది పాల్గొన్నారు. దేశభక్తి నినాదాలతో కార్యక్రమం ఉత్సాహభరితంగా ముగిసింది.