ముగ్గురు పిల్లల నిబంధన ఉల్లంఘన.. తెలంగాణ కో-ఆపరేటివ్ ట్రిబ్యునల్ ఉత్తర్వులు

నేలపట్ల చేనేత సహకార సంఘం నూతన ఛైర్మన్ ఎన్నిక వివాదంలో తెలంగాణ కో-ఆపరేటివ్ ట్రిబ్యునల్ కీలక తీర్పు వెలువరించింది. ముగ్గురు పిల్లలున్న విషయాన్ని దాచి నిబంధనలకు విరుద్ధంగా పోటీ చేసిన ఛైర్మన్ పిల్లలమర్రి శ్రీనివాసులు ఎన్నికపై ‘స్టే’ విధిస్తూ ఆదేశాలు జారీ చేసింది. ​జులై 10న జరిగిన సొసైటీ ఎన్నికల్లో స్థానిక పద్మశాలి కుల సంఘం ప్యానెల్ 6 స్థానాలు, శ్రీనివాస్ ప్యానెల్ 3 స్థానాలు గెలుచుకున్నాయి. అయితే, కుల సంఘం ప్యానెల్ నుంచి ఇద్దరు డైరెక్టర్లను తనవైపు తిప్పుకుని శ్రీనివాస్ అక్రమంగా ఛైర్మన్‌గా ఎన్నికయ్యారు.ఉమ్మడి రాష్ట్ర కో-ఆపరేటివ్ చట్టం ప్రకారం ఇద్దరి కంటే ఎక్కువ మంది పిల్లలు ఉన్నవారు పోటీకి అనర్హులు.ఈ నిబంధన ఆధారంగా కుల సంఘం డైరెక్టర్లు—తడక పారిజాత, పిల్లలమర్రి కిరణ్, గంజి శ్రీనివాసు, తడక కోటేశ్వర్—ఆగస్టు 5న కో-ఆపరేటివ్ ట్రిబ్యునల్‌ను ఆశ్రయించారు. పిటిషన్‌ను విచారించిన ట్రిబ్యునల్, శ్రీనివాస్‌కు ముగ్గురు సంతానం ఉన్నట్లు నిర్ధారించి ఛైర్మన్, డైరెక్టర్ ఎన్నికలపై ఆగస్టు 5 నుంచే అమలులోకి వచ్చేలా స్టే విధించింది. ఈ ఉత్తర్వుల కాపీని ప్రతినిధులు యాదాద్రి భువనగిరి జిల్లా చేనేత ఏడీ కి అందజేశారు.