నార్కట్‌పల్లి సమీపంలో పది దుకాణాలు దగ్ధం.. భారీ ఆస్తి నష్టం.

నల్లగొండ జిల్లా నార్కట్‌పల్లి మండలం చెరువుగట్టు వద్ద ఆదివారం అగ్నిప్రమాదం సంభవించింది. షార్ట్ సర్క్యూట్ కారణంగా ఒక్కసారిగా మంటలు చెలరేగి సమీపంలోని దుకాణాలకు వేగంగా వ్యాపించాయి. ఈ ప్రమాదంలో సుమారు పది దుకాణాలు అగ్నికి ఆహుతయ్యాయి.

సమాచారం అందుకున్న అగ్నిమాపక సిబ్బంది ఫైర్ ఇంజన్లతో ఘటనాస్థలికి చేరుకుని మంటలను అదుపులోకి తెచ్చేందుకు తీవ్రంగా శ్రమిస్తున్నారు. ప్రమాదం కారణంగా దుకాణాల్లోని సామగ్రి పూర్తిగా దగ్ధమై భారీ ఆస్తి నష్టం సంభవించినట్లు ప్రాథమిక సమాచారం.

అగ్నిప్రమాదానికి గల పూర్తి కారణాలు, ఆస్తి నష్టం విలువపై అధికారులు ఆరా తీస్తున్నారు. ఘటనతో ఆ ప్రాంతంలో తీవ్ర భయాందోళనలు నెలకొనగా, స్థానికులు పెద్ద సంఖ్యలో అక్కడికి చేరుకున్నారు. పోలీసులు, అగ్నిమాపక శాఖ సిబ్బంది సహాయక చర్యలను కొనసాగిస్తున్నారు.