ప్రాచీన భారతీయ క్రీడ అయిన మల్కంబ్‌ను రాష్ట్రవ్యాప్తంగా వ్యాపింపజేయడమే లక్ష్యంగా తెలంగాణ మల్కంబ్‌ అసోసియేషన్ ఆధ్వర్యంలో రెండు రోజుల శిక్షణ శిబిరం ప్రారంభమైంది. స్థానిక ట్రినిటీ విద్యాసంస్థల ఆవరణలో శిక్షకులకు 'లెవెల్-1' ప్రాథమిక నియమ నిబంధనలపై శిక్షణా కార్యక్రమాన్ని ఏర్పాటు చేశారు. శిబిరాన్ని చౌటుప్పల్ సీఐ మన్మథ కుమార్‌ ప్రారంభించి మాట్లాడారు. కేవలం పోలీస్ ట్రైనింగ్‌లోనే ఇలాంటి కఠినమైన శిక్షణ ఉంటుందనుకున్నామని, కానీ ఇక్కడ శిక్షకుల ప్రదర్శన చూశాక ఆశ్చర్యం కలిగిందన్నారు. అసోసియేషన్ ఆకాంక్ష నెరవేరి, ఇక్కడ శిక్షణ పొందిన మాస్టర్ ట్రెయినర్లు తీర్చిదిద్దే విద్యార్థులు భవిష్యత్తులో ఒలింపిక్స్‌లో పతకాలు సాధించాలని ఆకాంక్షించారు. ఈ సందర్భంగా శిక్షకులు చేసిన సాహస విన్యాసాలు అలరించాయి.​కార్యక్రమంలో ఎమ్‌ఎమ్‌ఆర్‌ కాలేజ్ ప్రిన్సిపాల్ సంజయ్ సాహు, ట్రినిటీ చైర్మన్ కేవీబీ కృష్ణారావు, తెలంగాణ మల్కంబ్‌ అసోసియేషన్ ప్రెసిడెంట్ డాక్టర్ ఉజ్జని మంజుల, జనరల్ సెక్రటరీ ముదావత్ గోపాల్, ట్రెజరర్ పోలే అంజయ్య, వివిధ జిల్లాల నుంచి వచ్చిన 42 మంది శిక్షకులు పాల్గొన్నారు.