శాంతిభద్రతల పరిరక్షణ, నేరాల నియంత్రణ మరియు రోడ్డు ప్రమాదాల నివారణలో భాగంగా ఉన్నతాధికారుల ఆదేశాల మేరకు మునగాల పోలీస్ స్టేషన్ పరిధిలో విస్తృతంగా వాహనాల తనిఖీలు చేపట్టారు. మునగాల ఎస్సై సంజీవ రెడ్డి ఆధ్వర్యంలో పోలీస్ సిబ్బంది శుక్రవారం రాత్రి మునగాల మండల కేంద్రం లోని ముఖ్యమైన కూడళ్ల వద్ద ముమ్మరంగా నాకాబందీ నిర్వహించారు.ఈ తనిఖీలలో భాగంగా అటుగా వెళ్లే అన్ని రకాల ద్విచక్ర, నాలుగు చక్రాల వాహనాలను నిలిపివేసి క్షుణ్ణంగా పరిశీలించారు. వాహనాలకు సంబంధించిన పత్రాలు (ఆర్సీ, డ్రైవింగ్ లైసెన్స్, ఇన్సూరెన్స్, పొల్యూషన్) సరిగా ఉన్నాయా లేదా అని తనిఖీ చేశారు. నిబంధనలు ఉల్లంఘించిన, సరైన పత్రాలు లేని వాహనదారులపై చట్టప్రకారం చర్యలు తీసుకుని జరిమానాలు విధించారు. అనుమానాస్పద వ్యక్తుల వివరాలను కూడా సేకరించారు.ఈ సందర్భంగా ఎస్ఐ మాట్లాడుతూ.. మండలంలో ఎలాంటి అసాంఘిక కార్యకలాపాలు జరగకుండా ఉండేందుకే ఈ నాకాబందీలు మరియు తనిఖీలు నిర్వహిస్తున్నట్లు తెలిపారు. వాహనదారులు తప్పనిసరిగా ట్రాఫిక్ నియమాలను పాటించాలని, లైసెన్స్ లేకుండా వాహనాలు నడపరాదని హెచ్చరించారు. శాంతిభద్రతల పరిరక్షణకు, నేరాల అదుపునకు ప్రజలు, వాహనదారులు పోలీసులకు పూర్తిగా సహకరించాలని కోరారు.