సంగారెడ్డి జిల్లా నారాయణఖేడ్ నియోజకవర్గంలోని కంగ్టి మండల కేంద్రంలో కంగ్టి సర్కిల్ ఇన్స్పెక్టర్ కార్యాలయంలో బుధవారం కంగ్టి సర్కిల్ ఇన్స్పెక్టర్ వెంకట్ రెడ్డి ఒక ప్రకటనలో మాట్లాడుతూ.. సైబర్ నేరగాళ్లు రోజురోజుకూ కొత్త పద్ధతుల్లో ప్రజలను మోసం చేస్తున్నారని, వాట్సాప్‌లో వచ్చే అనుమానాస్పద సందేశాల పట్ల అప్రమత్తంగా ఉండాలని సూచించారు. బ్యాంకు ఖాతా నుంచి రూ.50 వేలు కట్ అయ్యాయని, ఆ లావాదేవీ మీది కాకపోతే ‘యస్‌’ లేదా ‘నో’ అని సమాధానం ఇవ్వాలని గుర్తుతెలియని నంబర్ నుంచి సందేశం వస్తే వెంటనే స్పందించవద్దని తెలిపారు. ఇలాంటి సందేశాల ద్వారా ప్రజలను భయపెట్టి వారి బ్యాంకు వివరాలను సేకరించే అవకాశం ఉందని హెచ్చరించారు. ఖాతాలో నగదు కట్ అయినట్లు సందేశం వస్తే బ్యాంకు అధికారిక యాప్‌లో వివరాలను పరిశీలించాలని, గుర్తుతెలియని లింకులను తెరవకూడదని, ఓటీపీలు, పిన్‌లు, పాస్‌వర్డ్‌లు ఇతరులతో పంచుకోకూడదని సూచించారు. అనుమానం వస్తే బ్యాంకు అధికారిక కస్టమర్ కేర్‌ను సంప్రదించాలని, సైబర్ మోసానికి గురై నగదు కోల్పోతే వెంటనే 1930 నంబర్‌కు ఫోన్ చేసి ఫిర్యాదు చేయాలని సిఐ వెంకట్ రెడ్డి ప్రజలకు సూచించారు.