గ్రామ పాలన అధికారులుగా నియామకమై ఏడాది పూర్తి చేసుకున్న సందర్భంగా సంగారెడ్డిలో శుక్రవారం నిర్వహించనున్న కృతజ్ఞత సభకు హాజరుకావాలని గ్రామ పాలన అధికారుల సంఘం నాయకులు జగ్గారెడ్డిని ఆహ్వానించారు. గురువారం ఐబీ అతిథి గృహంలో టీపీసీసీ వర్కింగ్ ప్రెసిడెంట్ జగ్గారెడ్డిని కలిసి ఆహ్వానం అందజేశారు. ఈ సందర్భంగా గత ప్రభుత్వ హయాంలో గ్రామ రెవెన్యూ అధికారుల వ్యవస్థను రద్దు చేయడంతో ఇబ్బందులు ఎదుర్కొన్నామని, కాంగ్రెస్ ప్రభుత్వం అధికారంలోకి వచ్చిన అనంతరం తిరిగి తమ సొంత శాఖల్లో విధులు నిర్వహించే అవకాశం లభించిందని వారు వివరించారు. ఏడాది పూర్తి చేసుకున్న సందర్భంగా ప్రభుత్వానికి కృతజ్ఞతలు తెలిపేందుకు సభను నిర్వహిస్తున్నట్లు తెలిపారు. అనంతరం గ్రామ పాలన అధికారులకు టీపీసీసీ వర్కింగ్ ప్రెసిడెంట్ జగ్గారెడ్డి శుభాకాంక్షలు తెలియజేశారు. కార్యక్రమంలో సంఘం జిల్లా అధ్యక్షుడు సత్యనారాయణ, సహాయ కార్యదర్శి సుజాత, నాయకులు బొంగుల రవి, కూన సంతోష్, మున్సిపల్ వైస్ చైర్మన్ షఫీ హఫీజ్, టౌన్ కాంగ్రెస్ అధ్యక్షుడు కిరణ్ గౌడ్ తదితరులు పాల్గొన్నారు.