కూల్చివేతలు లేకుండా రోడ్డు నిర్మించాలి.. అక్టోబర్ 30లోగా అంచనాలు సిద్ధం చేయాలి

సదాశివపేట పట్టణంలోని సిద్దాపూర్ రోడ్డు సమస్యకు శాశ్వత పరిష్కారం చూపాలని టీపీసీసీ వర్కింగ్ ప్రెసిడెంట్ జగ్గారెడ్డి అధికారులను ఆదేశించారు. నిర్మల జగ్గారెడ్డితో కలిసి సిద్దాపూర్ రోడ్డును పరిశీలించిన ఆయన, సంబంధిత శాఖల అధికారులతో రోడ్డు నిర్మాణం, డ్రైనేజీ, వర్షపు నీటి పారుదల, కల్వర్టుల ఏర్పాటుపై సమీక్ష నిర్వహించారు. మెయిన్ రోడ్డు నుంచి సిద్దాపూర్ ఈద్గా వరకు సుమారు 1.5 కిలోమీటర్ల మేర పూర్తిస్థాయిలో సీసీ రోడ్డు నిర్మించాలని, వర్షపు నీరు నిలవకుండా సరైన లెవల్స్‌తో డ్రైన్లు, అవసరమైన చోట కల్వర్టులు ఏర్పాటు చేయాలని సూచించారు.రోడ్డు నిర్మాణం పేరుతో ఎలాంటి కూల్చివేతలు చేపట్టవద్దని, పాన్‌షాపులు, పూల దుకాణాలు, మటన్, చికెన్ దుకాణాలతో పాటు చిరు వ్యాపారులకు ఇబ్బందులు కలగకుండా పనులు చేపట్టాలని స్పష్టం చేశారు. అందుబాటులో ఉన్న స్థలాన్ని బట్టి రోడ్డు వెడల్పును నిర్ణయించి, సిద్దాపూర్ కూడలిని కూడా అభివృద్ధి చేయాలని, రోడ్డు పనులకు అడ్డుగా ఉన్న విద్యుత్ స్తంభాలను తరలించేందుకు చర్యలు తీసుకోవాలని అధికారులకు సూచించారు.ఈ పనులకు రూ.2 కోట్ల నిధులతో పాటు మున్సిపాలిటీలో టీఎఫ్‌ఐడీసీకి చెందిన మరో రూ.5 కోట్ల నిధులు అందుబాటులో ఉన్నాయని తెలిపారు. సంబంధిత శాఖల అధికారులు సమన్వయంతో పనిచేసి అక్టోబర్ 30లోగా రోడ్డు నిర్మాణానికి సంబంధించిన అంచనాలు సిద్ధం చేయాలని ఆదేశించారు. 2004లో తాను ఎమ్మెల్యేగా ఉన్నప్పుడు ఈ రోడ్డు నిర్మించానని గుర్తుచేస్తూ, ఇకపై సమస్య పునరావృతం కాకుండా శాశ్వత పరిష్కారం చూపాలని అన్నారు. పట్టణ, మండల ప్రజల సమస్యలను తెలుసుకునేందుకు ప్రతిరోజూ ఒక ప్రాంతంలో పర్యటిస్తానని, త్వరలో ఊబ చెరువును కూడా పరిశీలిస్తానని జగ్గారెడ్డి తెలిపారు.