వలిగొండ రోడ్డు జంక్షన్ మార్గం పునరుద్ధరణ

రాత్రికే రాత్రే రోడ్డును పునరుద్ధరించిన అధికారులు

స్థానికుల హర్షం.. శివకుమార్ గౌడ్ ఆధ్వర్యంలో సమరదీక్షకు దక్కిన ప్రతిఫలం

యాదాద్రి భువనగిరి జిల్లా చౌటుప్పల్ పట్టణంలో ప్రజలు ఎదుర్కొంటున్న కీలక సమస్యపై నిర్వహించిన పోరాటం తుది ఫలితాన్నిచ్చింది. వలిగొండ రోడ్డు జంక్షన్ వద్ద ప్రజలు, వాహనదారులు ఎదుర్కొంటున్న రాకపోకల తీవ్ర ఇబ్బందులను పరిష్కరించాలంటూ శుక్రవారం రాత్రి స్థానిక నాయకుడు చెరుకు శివకుమార్ గౌడ్ ఆధ్వర్యంలో ప్రజలు చేపట్టిన మెరుపు ధర్నాకు అధికారులు సానుకూలంగా స్పందించారు.

​వలిగొండ రోడ్డు జంక్షన్ మార్గం మూసివేత, ఇబ్బందుల వల్ల నిత్యం తీవ్ర నరకం చూస్తున్నామని, ఈ సమస్యను వెంటనే పరిష్కరించాలని కోరుతూ స్థానికులతో కలసి శివకుమార్ గౌడ్ రోడ్డుపై ధర్నాకు దిగారు. సమాచారం అందుకున్న సంబంధిత అధికారులు, సిబ్బంది తక్షణమే రంగంలోకి దిగి పరిస్థితిని సమీక్షించారు. సమస్య తీవ్రతను గుర్తించి, రాకపోకలకు వీలుగా రోడ్డు మార్గం పునరుద్ధరణ పనులను చేపట్టి మార్గాన్ని సుగమం చేశారు. అనంతరం చెరుకు శివకుమార్ గౌడ్ మాట్లాడుతూ.. ప్రజా సమస్యల పరిష్కారమే ధ్యేయంగా తమ పోరాటం సాగుతుందని తెలిపారు. ప్రజల ఇబ్బందులను అర్థం చేసుకుని, వేగంగా స్పందించి మార్గాన్ని పునరుద్ధరించిన సంబంధిత అధికారులు, సిబ్బంది, ఈ పోరాటంలో భాగస్వాములైన ప్రతి ఒక్కరికీ ఆయన ప్రత్యేక ధన్యవాదాలు తెలిపారు. ఎల్లప్పుడూ ప్రజల పక్షాన నిలబడి నిరంతరం పోరాడతానని ఈ సందర్భంగా స్పష్టం చేశారు. ​ప్రజా సమస్యల పట్ల తక్షణమే స్పందించి, రాత్రికి రాత్రే పోరాటం నిర్వహించి మార్గాన్ని పునరుద్ధరించేలా చేసిన శివకుమార్ గౌడ్ చొరవను చౌటుప్పల్ స్థానికులు, వాహనదారులు తీవ్రంగా అభినందించారు.