విజయవాడ–హైదరాబాద్ జాతీయ రహదారిపై తూప్రాన్‌పేట్‌ వద్ద శనివారం తెల్లవారుజామున జరిగిన రోడ్డు ప్రమాదంలో ఒకరు మృతి చెందగా, మరో ఇద్దరు తీవ్రంగా గాయపడ్డారు. ​బాధితుల కథనం ప్రకారం... నల్గొండ జిల్లా నకిరేకల్ మండలం వల్లభాపురం గ్రామానికి చెందిన కాడింగు యాదగిరి (26), తన స్నేహితులు రాచకొండ గణేష్ (28), కొరివి జగదీష్ (27)లతో కలిసి చేపల వ్యాపారం నిమిత్తం కారులో ( టి ఎస్ 05 యు ఎఫ్ 7327) ఖమ్మం నుంచి హైదరాబాద్‌ వైపు బయలుదేరారు. కారును జగదీష్ నడుపుతున్నాడు.​తెల్లవారుజామున సుమారు 3:00 గంటల సమయంలో తూప్రాన్‌పేట్‌లోని రంగమ్మ గారి కిచెన్ హోటల్ ఎదురుగా వీరు ప్రయాణిస్తున్న కారు చేరుకుంది. అదే సమయంలో వీరి ముందు వెళ్తున్న డిసిఎమ్ ( టి ఎస్ 06 యు బి 6008) వాహన డ్రైవర్ తాళ్ల నిరంజన్ అతివేగంగా, అజాగ్రత్తగా ఎలాంటి సిగ్నల్ ఇవ్వకుండా అకస్మాత్తుగా ఎడమ వైపు నుంచి కుడి వైపునకు మళ్లించాడు. దీంతో వెనుక వస్తున్న కారు సడన్‌గా డిసిఎమ్‌ వెనుక భాగాన్ని బలంగా ఢీకొట్టింది.​ఈ ప్రమాదంలో కారులో ఉన్న యాదగిరి, జగదీష్, గణేష్‌లకు తీవ్ర గాయాలయ్యాయి. సమాచారం అందుకున్న 108 సిబ్బంది బాధితులను వెంటనే హయత్‌నగర్‌లోని సన్‌రైజ్ ఆసుపత్రికి తరలించారు. అక్కడ చికిత్స పొందుతూ యాదగిరి మృతి చెందాడు. మిగిలిన ఇద్దరు ప్రస్తుతం ఆసుపత్రిలో అత్యవసర చికిత్స పొందుతున్నారు.​మృతుని తండ్రి కడింగు ఉప్పలయ్య (54) ఇచ్చిన ఫిర్యాదు మేరకు పోలీసులు కేసు నమోదు చేసుకుని దర్యాప్తు ప్రారంభించారు.