నాంపల్లి, అక్టోబర్ 10: ట్రూ అప్‌ ఛార్జీల పేరుతో ప్రజలపై రూ.5,420 కోట్ల విద్యుత్‌ భారాన్ని మోపే ఆలోచనను ప్రభుత్వం విరమించుకోవాలని సీపీఎం మండల కార్యదర్శి నాంపల్లి చంద్రమౌళి డిమాండ్‌ చేశారు. శుక్రవారం పస్నూరు గ్రామంలో నిర్వహించిన రైతు సంఘం ప్రచార కార్యక్రమంలో ఆయన మాట్లాడారు.

ఇప్పటికే ధరల పెరుగుదల, కరువు పరిస్థితులతో ఇబ్బందులు పడుతున్న ప్రజలపై అదనపు విద్యుత్‌ భారం మోపడం సరికాదన్నారు. ప్రభుత్వ శాఖల నుంచి రావాల్సిన రూ.57,336 కోట్ల విద్యుత్‌ బకాయిలను వసూలు చేయకుండా ప్రజలపై భారం వేస్తే రాష్ట్రవ్యాప్తంగా విద్యుత్‌ ఉద్యమం చేపడతామని హెచ్చరించారు.

విద్యుత్‌ కోతలు, లో-వోల్టేజీ సమస్యలతో రైతులు తీవ్ర ఇబ్బందులు పడుతున్నారని, మోటార్లు కాలిపోయి నష్టపోతున్నారని తెలిపారు. రైతులకు నిరంతరాయంగా నాణ్యమైన విద్యుత్‌ సరఫరా చేసి పంటలను కాపాడాలని కోరారు.

నవంబర్‌ 15 నుంచి 18 వరకు నల్లగొండలో జరిగే అఖిల భారత రైతు సంఘం 36వ జాతీయ మహాసభలను, 15న నిర్వహించే బహిరంగ సభను విజయవంతం చేయాలని రైతులు, ప్రజలకు పిలుపునిచ్చారు. కార్యక్రమంలో సీపీఎం నాయకులు దానపాక ముత్తిలింగం, ఆకారపు కాశయ్య, రెడ్డిమల్ల గోవింద్‌ తదితరులు పాల్గొన్నారు.