కుళ్లిపోయిన స్థితిలో సుమారు 50-60 ఏళ్ల వృద్ధుడి శవం

ఆచూకీ తెలిస్తే సమాచారం ఇవ్వాలని చౌటుప్పల్ ఇన్ స్పెక్టర్ విజ్ఞప్తి

చౌటుప్పల్ పోలీస్ స్టేషన్ పరిధిలోని మల్కాపురం ఆర్‌టీవో కార్యాలయం పక్కన ఉన్న గుట్టల ప్రాంతంలో గుర్తుతెలియని ఒక వ్యక్తి (సుమారు 50 నుండి 60 సంవత్సరాల వయస్సు) మృతదేహం లభ్యమైనట్లు పోలీసులు తెలిపారు.బుధవారం గుట్టల వైపు వెళ్లిన స్థానికులు మృతదేహాన్ని గమనించి చౌటుప్పల్ పోలీసులకు సమాచారం అందించారు. వెంటనే పోలీసులు సంఘటనా స్థలానికి చేరుకుని మృతదేహాన్ని పరిశీలించారు. శవం పూర్తిగా డీకంపోజ్ (కుళ్లిపోయిన) స్థితిలో ఉన్నట్లు పోలీసులు ప్రాథమికంగా గుర్తించారు. మృతదేహాన్ని స్వాధీనం చేసుకుని, కేసు నమోదు చేసి దర్యాప్తు ప్రారంభించారు. సదరు వ్యక్తి మృతికి గల కారణాలు, అతని వివరాలను తెలుసుకునేందుకు దర్యాప్తు తీవ్రతరం చేశామని చౌటుప్పల్ ఇన్‌స్పెక్టర్ జి. మన్మధ కుమార్ తెలిపారు. ఈ వ్యక్తి ఆచూకీ, గుర్తింపు లేదా ఏదైనా సమాచారం తెలిసిన వారు వెంటనే చౌటుప్పల్ పోలీస్ స్టేషన్‌లోగానీ, పోలీసు అధికారులనుగానీ సంప్రదించాలని ఆయన కోరారు.