వలిగొండ, స్థానిక న్యూస్‌: ఆగి ఉన్న లారీల నుంచి డీజిల్‌ దొంగతనానికి పాల్పడిన వ్యక్తిని అరెస్టు చేసి రిమాండ్‌కు తరలించినట్లు రామన్నపేట సీఐ మోలుగూరి రవి తెలిపారు. శుక్రవారం వలిగొండ పోలీస్‌ స్టేషన్‌లో ఏర్పాటు చేసిన విలేకరుల సమావేశంలో కేసు వివరాలను వెల్లడించారు.

ఈ నెల 21న వలిగొండ మండలంలోని లోతుకుంట గ్రామానికి చెందిన లారీ యజమానులు తమ వాహనాలను మండల కేంద్రంలోని భారత్‌ పెట్రోల్‌ బంకు వద్ద నిలిపి ఉంచారు. ఈ క్రమంలో గుర్తుతెలియని వ్యక్తులు మూడు లారీల డీజిల్‌ ట్యాంకర్ల తాళాలు పగలగొట్టి 750 లీటర్ల డీజిల్‌ను క్యాన్లలో నింపుకుని పరారయ్యారు. బాధితుల ఫిర్యాదు మేరకు కేసు నమోదు చేసిన పోలీసులు దర్యాప్తు చేపట్టారు.

ఈ నేపథ్యంలో గురువారం ఉదయం అంబేద్కర్‌ చౌరస్తా వద్ద వాహనాల తనిఖీలు నిర్వహిస్తుండగా, హైదరాబాద్‌లోని బోరబండకు చెందిన సయ్యద్‌ సోహెల్‌ అలియాస్‌ పప్పు సోహెల్‌ అద్దె కారులో వస్తూ పోలీసులకు పట్టుబడ్డాడు. విచారణలో డీజిల్‌ దొంగతనానికి పాల్పడినట్లు అంగీకరించినట్లు సీఐ తెలిపారు.

సోహెల్‌కు గతంలో జైలులో పరిచయమైన గణేష్‌, సల్మాన్‌, షఫీ, ఇమ్రాన్‌ తదితరులు కూడా ఈ కేసులో నిందితులుగా ఉన్నట్లు వెల్లడించారు. డీజిల్‌ విక్రయం ద్వారా వచ్చిన రూ.1.70 లక్షల నగదు, నీలిరంగు బాలెనో కారు, మొబైల్‌ ఫోన్‌ను పోలీసులు స్వాధీనం చేసుకున్నారు. మరో ఐదుగురు నిందితులు పరారీలో ఉన్నట్లు తెలిపారు.

నిందితుడిని పట్టుకోవడంలో చాకచక్యంగా వ్యవహరించిన ఎస్‌ఐ శ్రీకాంత్‌రెడ్డి, పోలీసు సిబ్బందిని సీఐ రవి అభినందించారు.