రామగిరి వద్ద బైక్‌ను ఢీకొట్టిన గుర్తుతెలియని వాహనం.. హైదరాబాద్‌కు తరలింపు.

నేరేడుచర్ల: సూర్యాపేట జిల్లా నేరేడుచర్ల మున్సిపాలిటీ పరిధిలోని రామగిరి వద్ద బుధవారం జరిగిన రోడ్డు ప్రమాదంలో మిర్యాలగూడ టూ టౌన్ ఎస్సై అత్తి సతీష్‌ (34) తీవ్రంగా గాయపడ్డారు. విధులకు హాజరయ్యేందుకు బైక్‌పై వెళ్తుండగా గుర్తుతెలియని వాహనం ఢీకొట్టడంతో ఈ ప్రమాదం చోటుచేసుకుంది.

నేరేడుచర్ల మండలం కందులవారిగూడెం గ్రామానికి చెందిన సతీష్‌ మిర్యాలగూడ టూ టౌన్ పోలీస్‌స్టేషన్‌లో ఎస్సైగా విధులు నిర్వహిస్తున్నారు. రోజూ స్వగ్రామం నుంచి విధులకు రాకపోకలు సాగిస్తుంటారు. ఈ క్రమంలో బుధవారం బైక్‌పై వెళ్తుండగా రామగిరి వద్ద గుర్తుతెలియని వాహనం ఆయనను ఢీకొట్టింది. ఈ ఘటనలో ఆయన తలకు తీవ్ర గాయాలయ్యాయి.

ప్రమాదాన్ని గమనించిన స్థానికులు వెంటనే 108 అంబులెన్స్‌కు సమాచారం అందించి, సతీష్‌ను మిర్యాలగూడలోని లీల ఆసుపత్రికి తరలించారు. ఆయన పరిస్థితి విషమంగా ఉండటంతో మెరుగైన వైద్యం కోసం హైదరాబాద్‌కు తరలిస్తున్నారు.