లేఅవుట్‌ సర్వే నివేదిక కోసం రూ.30 లక్షలు డిమాండ్‌ చేసినట్లు ఆరోపణ

అబ్దుల్లాపూర్‌మెట్‌, అక్టోబర్‌ 13: లేఅవుట్‌ జాయింట్‌ ఇన్‌స్పెక్షన్‌ సర్వే నివేదిక జారీ చేసేందుకు రూ.20 లక్షలు లంచం తీసుకుంటూ అబ్దుల్లాపూర్‌మెట్‌ తహశీల్దార్‌ బి. సుదర్శన్‌రెడ్డి, మండల సర్వేయర్‌ బటుక శ్రీనివాసులు ఏసీబీ అధికారులకు పట్టుబడ్డారు. లేఅవుట్‌ క్లియరెన్స్‌ కోసం తొలుత రూ.30 లక్షలు డిమాండ్‌ చేయగా, చివరకు రూ.20 లక్షలకు ఒప్పందం కుదిరినట్లు ఆరోపణలు ఉన్నాయి.

సర్వేయర్‌ ద్వారా వసూలు

తహశీల్దార్‌ ఆదేశాల మేరకు సర్వేయర్‌ శ్రీనివాసులు బాధితుడి నుంచి రూ.20 లక్షలు స్వీకరిస్తుండగా ఏసీబీ అధికారులు దాడి చేసి పట్టుకున్నారు. సర్వేయర్‌ చేతులకు నిర్వహించిన రసాయన పరీక్షలో పాజిటివ్‌ వచ్చినట్లు సమాచారం. లంచం సొమ్ము రూ.20 లక్షలను అధికారులు స్వాధీనం చేసుకున్నారు.

ఇద్దరి అరెస్ట్‌.. కోర్టుకు తరలింపు

ఈ కేసులో తహశీల్దార్‌ సుదర్శన్‌రెడ్డి, సర్వేయర్‌ శ్రీనివాసులును అరెస్టు చేసిన ఏసీబీ అధికారులు నాంపల్లిలోని ఏసీబీ కోర్టుకు తరలించారు. ప్రభుత్వ కార్యాలయాల్లో లంచం అడిగే ఉద్యోగులపై ఫిర్యాదు చేసేందుకు ప్రజలు ముందుకు రావాలని ఏసీబీ అధికారులు సూచించారు. ఎవరైనా ప్రభుత్వ ఉద్యోగి లంచం డిమాండ్‌ చేస్తే టోల్‌ఫ్రీ నంబర్‌ 1064కు ఫిర్యాదు చేయాలని విజ్ఞప్తి చేశారు.