చండీదేవి అవతారంలో దర్శనమిచ్చిన అమ్మవారు.. భక్తిశ్రద్ధలతో కుంకుమార్చనలు

చౌటుప్పల్ భవానీనగర్‌లోని శ్రీ సీతారామచంద్రస్వామి దేవాలయంలో శ్రీ దుర్గాదేవి శరన్నవరాత్రి ఉత్సవాలు అంగరంగ వైభవంగా కొనసాగుతున్నాయి. ఉత్సవాల్లో భాగంగా బుధవారం అమ్మవారు చండీదేవి అవతారంలో భక్తులకు దివ్యదర్శనమిచ్చారు.

​గాంధీ గ్లోబల్ ఫ్యామిలీ చౌటుప్పల్ మండల శాఖ ఆధ్వర్యంలో నిర్వహించిన ఈ కార్యక్రమంలో మహిళా భక్తులు విశేష సంఖ్యలో పాల్గొన్నారు. అమ్మవారికి ప్రత్యేకంగా కుంకుమార్చనలు, లలితా సహస్రనామ పారాయణం, అష్టోత్తర శతనామావళి పూజలు భక్తిశ్రద్ధలతో గావించారు. గాంధీ గ్లోబల్ ఫ్యామిలీ మండల అధ్యక్ష, ప్రధాన కార్యదర్శులు వెన్ రెడ్డి సంధ్య, డాక్టర్ ఉజ్జీనీ మంజుల ఆధ్వర్యంలో నిర్వహించారు. ఈ సందర్భంగా గాంధీ గ్లోబల్ ఫ్యామిలీ ప్రతినిధులు మాట్లాడుతూ.. రామాలయంలో ఎంతో వైభవంగా జరుగుతున్న ఈ శరన్నవరాత్రి వేడుకల్లో చౌటుప్పల్‌లోని మహిళా భక్తులందరూ పెద్ద సంఖ్యలో పాల్గొని దుర్గాదేవి దివ్యాశీస్సులు పొందాలని ఆకాంక్షించారు.​ఈ కార్యక్రమంలో దేవాలయ కమిటీ ధర్మకర్తల మండలి చైర్మన్ బొబ్బిళ్ళ మురళి గురుస్వామి, నాయకులు వర్కల రవి గౌడ్, ఆవుల యేసు యాదవ్, గుగులోతు అరుణ, మహిళా భక్తులు పెద్ది స్వాతి, కిషోర్ శర్మ, చింతల కరుణ, గాంధీ గ్లోబల్ ఫ్యామిలీ సభ్యులు పోలోజు శ్రీలత, ముటుకులోజు నీరజ, వనం మమత, సురోజు శోభారాణి, జూకంటి రేవతి, నిమ్మల అండాలు, మామిడి వెంకటమ్మ తదితరులు పాల్గొన్నారు.