అరుదైన గ్రంథాల పరిరక్షణపై అధ్యయనం

హైదరాబాద్‌: తెలంగాణలోని వివిధ ప్రభుత్వ డిగ్రీ కళాశాలలకు చెందిన గ్రంథపాలకుల బృందం ఆంధ్రప్రదేశ్‌లోని ప్రముఖ గ్రంథాలయాలను సందర్శించింది. గుంటూరులోని ప్రాంతీయ గ్రంథాలయం, తిక్కన గ్రంథాలయం, ఆచార్య నాగార్జున విశ్వవిద్యాలయ కేంద్ర గ్రంథాలయం, గ్రంథాలయ శాస్త్ర విభాగాన్ని పరిశీలించింది.

ఈ సందర్భంగా గ్రంథాలయాల నిర్వహణ, డిజిటల్‌ సేవలు, అరుదైన పుస్తకాల సంరక్షణపై అధ్యయనం చేశారు. గ్రంథాలయాలు భావితరాలకు విజ్ఞాన సంపదను అందించే కేంద్రాలని గ్రంథపాలకులు పేర్కొన్నారు. తాళపత్ర గ్రంథాలు, పురాతన పుస్తకాలను పరిరక్షించడంతోపాటు విద్యార్థుల్లో పఠనాసక్తిని పెంపొందించాలని సూచించారు.

ఈ యాత్రలో డా. దుర్గా ప్రసాద్‌, డా. మాతంగి యాకూబ్‌, డా. నాగరాజు, డా. జగదీష్‌, డా. రవి కుమార్‌ చేగోని పాల్గొన్నారు. గ్రంథాలయాల అభివృద్ధికి ప్రభుత్వాలు, విద్యావేత్తలు సమిష్టిగా కృషి చేయాలని వారు పిలుపునిచ్చారు.