7 హోటళ్ల లైసెన్సులు సస్పెండ్‌,లైసెన్స్‌ లేని హోటల్‌ సీజ్‌...

20 సంస్థల్లో తనిఖీలు..20 ఆహార నమూనాల సేకరణ...

పురుగులు, బొద్దింకలు.. ఫంగస్‌ పట్టిన కూరగాయలు గుర్తింపు...

నల్గొండ : జాతీయ రహదారి–65పై ప్రయాణికులకు ఆహారం అందిస్తున్న హోటళ్లు, రెస్టారెంట్లు, ధాబాల్లో ఆహార భద్రత ప్రమాణాల అమలుపై అధికారులు ప్రత్యేక దృష్టి సారించారు. ప్రజలకు సురక్షితమైన, నాణ్యమైన ఆహారం అందించడమే లక్ష్యంగా టీజీ సేఫ్‌ (తెలంగాణ స్టాండర్డ్స్‌ అథారిటీ ఫర్‌ ఫుడ్‌ అండ్‌ ఎసెన్షియల్‌ డ్రగ్స్‌) ఆధ్వర్యంలో విస్తృత తనిఖీలు నిర్వహించారు. ఈ తనిఖీల్లో పలు సంస్థల్లో అపరిశుభ్రత, ఆహార పదార్థాల నిల్వలో లోపాలు, నిబంధనల ఉల్లంఘనలు వెలుగుచూశాయి. నిబంధనలను తీవ్రంగా ఉల్లంఘించిన ఏడు సంస్థల ఆహార భద్రత లైసెన్సులను అధికారులు సస్పెండ్‌ చేయగా, కనీస లైసెన్స్‌ కూడా లేకుండా నిర్వహిస్తున్న ఓ హోటల్‌ను సీజ్‌ చేశారు. మొత్తం 20 సంస్థల్లో తనిఖీలు చేపట్టి, నాణ్యత పరీక్షల కోసం 20 ఆహార నమూనాలను సేకరించారు.

10 ప్రత్యేక బృందాలతో తనిఖీలు...

టీజీ సేఫ్‌ కమిషనర్‌ అవినాష్‌ మహంతి ఐపీఎస్‌ ఆదేశాల మేరకు అసిస్టెంట్‌ ఫుడ్‌ కంట్రోలర్‌ జ్యోతిర్మయి పర్యవేక్షణలో అక్టోబరు 13న ఈ ప్రత్యేక తనిఖీలు చేపట్టారు. మొత్తం 10 ప్రత్యేక బృందాలు రంగంలోకి దిగాయి. నల్గొండ, సూర్యాపేట, యాదాద్రి భువనగిరి, మెదక్‌, సంగారెడ్డి జిల్లాలతోపాటు హైదరాబాద్‌లోని క్యూర్‌ (CURE) ప్రాంతానికి చెందిన అధికారులు, పోలీసు సిబ్బంది సహా సుమారు 60 మంది ఈ కార్యక్రమంలో పాల్గొన్నారు. జాతీయ రహదారిపై ఉన్న హోటళ్లు, రెస్టారెంట్లు, ధాబాల్లో ఆహార తయారీ విధానం, వంటగదుల పరిశుభ్రత, ముడి పదార్థాల నిల్వ, లైసెన్సులు, ఆహార భద్రత నిబంధనల అమలును పరిశీలించారు.

నిబంధనలు ఉల్లంఘించిన సంస్థలపై చర్యలు...

ప్రత్యేక తనిఖీల్లో భాగంగా మొత్తం 20 ఆహార వ్యాపార సంస్థలను తనిఖీ చేసి, వివిధ రకాల ఆహార పదార్థాలకు చెందిన 20 నమూనాలను సేకరించారు. తీవ్రమైన ఉల్లంఘనలకు పాల్పడిన ఏడు సంస్థల లైసెన్సులను సస్పెండ్‌ చేశారు. చెల్లుబాటు అయ్యే ఆహార భద్రత లైసెన్స్‌ లేకుండా నిర్వహిస్తున్న ఓ హోటల్‌ను మూసివేసి సీజ్‌ చేశారు. లోపాలను సరిదిద్దుకోవాలని ఆరు మెరుగుదల నోటీసులు, నిబంధనల ఉల్లంఘనలపై వివరణ ఇవ్వాలని కోరుతూ మరో ఆరు షోకాజ్‌ నోటీసులు జారీ చేశారు. ఆహార పదార్థాల నాణ్యతతోపాటు ప్రజారోగ్యానికి ముప్పు కలిగించే అంశాలపై అధికారులు ప్రత్యేకంగా దృష్టి సారించారు.

నల్గొండలో 10 సంస్థల్లో తనిఖీలు...

నల్గొండ జిల్లాలోని 10 ఆహార వ్యాపార సంస్థలను అధికారులు తనిఖీ చేశారు. తీవ్రమైన ఉల్లంఘనల కారణంగా రెండు సంస్థల లైసెన్సులను సస్పెండ్‌ చేశారు. లైసెన్స్‌ లేకుండా నిర్వహిస్తున్న మరో హోటల్‌ను సీజ్‌ చేశారు. నిబంధనల ఉల్లంఘనలకు సంబంధించి ఏడు సంస్థలకు నోటీసులు జారీ చేశారు. తనిఖీల సందర్భంగా పప్పుధాన్యాలు, చికెన్‌ కర్రీ, టీ పొడి, జీడిపప్పు, పనీర్‌, వంటనూనె, సాస్‌ల నమూనాలను సేకరించి నాణ్యత పరీక్షలకు పంపేందుకు చర్యలు చేపట్టారు.

సూర్యాపేటలో మూడు సంస్థల లైసెన్సులు సస్పెన్షన్‌...

సూర్యాపేట జిల్లాలో ఆరు సంస్థల్లో తనిఖీలు నిర్వహించారు. ఆహార భద్రత నిబంధనలను తీవ్రంగా ఉల్లంఘించిన మూడు సంస్థల లైసెన్సులను సస్పెండ్‌ చేశారు. మరో మూడు సంస్థల్లో పరిశుభ్రతకు సంబంధించిన లోపాలను పరిశీలించి అవసరమైన నోటీసులు జారీ చేశారు. పనీర్‌, సోయా సాస్‌ నమూనాలను సేకరించారు. వంటగదుల నిర్వహణ, ఆహార పదార్థాల నిల్వ, పరిశుభ్రత ప్రమాణాలపై అధికారులు తనిఖీలు చేపట్టారు.

యాదాద్రి జిల్లాలోనూ లోపాలు...

యాదాద్రి భువనగిరి జిల్లాలో నాలుగు సంస్థలను తనిఖీ చేయగా, రెండు సంస్థల లైసెన్సులను సస్పెండ్‌ చేశారు. ఆహార పదార్థాల నిల్వలో లోపాలు, FIFO/FEFO విధానాల ఉల్లంఘనలకు సంబంధించి మరో రెండు సంస్థలకు నోటీసులు జారీ చేశారు. నిల్వ చేసిన పదార్థాల గడువు, వాటిని వినియోగించే క్రమం, నాణ్యతను కాపాడే విధానాలను అధికారులు పరిశీలించారు. ఎర్ర కందిపప్పు, టీ పొడి, అల్లం–వెల్లుల్లి పేస్ట్‌ నమూనాలను సేకరించారు.

పురుగులు.. బొద్దింకలు ఫంగస్‌...

తనిఖీల సందర్భంగా కొన్ని సంస్థల్లో ఆహార భద్రతకు విఘాతం కలిగించే పరిస్థితులను అధికారులు గుర్తించారు. వంటకాల్లో పురుగులు ఉండటం, వంటగదుల్లో బొద్దింకలు కనిపించడం, అపరిశుభ్రంగా ఉన్న రిఫ్రిజిరేటర్లు, ఫంగస్‌ పట్టిన కూరగాయలు, ఎలుకల విసర్జనలతో కలుషితమైన ఆహార పదార్థాలు బయటపడినట్లు నివేదికలో పేర్కొన్నారు. శాకాహార, మాంసాహార పదార్థాలను కలిపి నిల్వ చేయడం, పచ్చి మాంసంతోపాటు ఐస్‌ ముక్కలను ఉంచడం, జిడ్డు పేరుకుపోయిన ఎగ్జాస్ట్‌ వ్యవస్థలు, డ్రైనేజీలో ఆహార వ్యర్థాలను వేయడం వంటి లోపాలను గుర్తించారు. కొన్ని సంస్థల్లో అనుమతిలేని సింథటిక్‌ ఆహార రంగుల వినియోగం, ఆహార పదార్థాల లేబులింగ్‌లో లోపాలు కూడా గుర్తించారు. సిబ్బందికి సంబంధించిన వైద్య ధ్రువపత్రాలు, పురుగుల నియంత్రణకు సంబంధించిన రికార్డులు అందుబాటులో లేకపోవడాన్ని అధికారులు నమోదు చేశారు. ఈ లోపాలు ఆహార నాణ్యతపై ప్రభావం చూపడమే కాకుండా, వినియోగదారుల ఆరోగ్యానికి ముప్పు కలిగించే అవకాశముండటంతో నిబంధనల ప్రకారం చర్యలు చేపట్టారు.

పరిశుభ్రత పాటించాలి...

ప్రజలకు సురక్షితమైన, నాణ్యమైన ఆహారం అందించడమే ప్రత్యేక తనిఖీల ప్రధాన ఉద్దేశమని అసిస్టెంట్‌ ఫుడ్‌ కంట్రోలర్‌ జ్యోతిర్మయి తెలిపారు. హోటళ్లు, రెస్టారెంట్లు, ధాబాల నిర్వాహకులు చెల్లుబాటు అయ్యే ఆహార భద్రత లైసెన్సులను తప్పనిసరిగా పొందడంతోపాటు వాటిని ప్రముఖంగా ప్రదర్శించాలని సూచించారు. వంటగదులు, ఆహార నిల్వ ప్రాంతాలను ఎప్పటికప్పుడు పరిశుభ్రంగా ఉంచాలని, ఆహార పదార్థాలను సరైన పద్ధతుల్లో నిల్వ చేయాలని పేర్కొన్నారు. తయారీ తేదీ, వినియోగ గడువు వివరాలను స్పష్టంగా నమోదు చేయాలని, సిబ్బంది ఆరోగ్యానికి సంబంధించిన రికార్డులు, పురుగుల నియంత్రణ చర్యలను సక్రమంగా నిర్వహించాలని సూచించారు. ఆహార భద్రత ప్రమాణాలను పాటించని, ప్రజారోగ్యానికి హాని కలిగించే విధంగా వ్యవహరించే సంస్థలపై చట్టప్రకారం కఠిన చర్యలు కొనసాగుతాయని ఆమె స్పష్టం చేశారు. జాతీయ రహదారులపై ప్రయాణించే ప్రజలకు నాణ్యమైన ఆహారం అందేలా తనిఖీలు, పర్యవేక్షణను కొనసాగించనున్నట్లు తెలిపారు.