సదాశివపేట పట్టణంలోని ఆర్టీసీ బస్టాండ్‌ వద్ద పార్క్‌ చేసిన ఆటోను దొంగిలించిన నిందితుడిని పోలీసులు అరెస్ట్‌ చేసి, ఆటోను స్వాధీనం చేసుకున్నారు. సెప్టెంబర్‌ 29, 2026న తెల్లవారుజామున బస్టాండ్‌ బయట పార్క్‌ చేసిన ఆటోను గుర్తుతెలియని వ్యక్తి దొంగిలించగా, బాధితుడి ఫిర్యాదు మేరకు ఇన్‌స్పెక్టర్‌ డి. వెంకటేష్‌ కేసు నమోదు చేసి దర్యాప్తు చేపట్టారు. పోలీసులు శాస్త్రీయ పద్ధతుల్లో విచారణ జరిపి నిందితుడు చౌహాన్‌ గోవింద్‌ను గుర్తించి పట్టుకున్నారు. విచారణలో నిందితుడు మద్యానికి బానిసై, చెడు వ్యసనాలకు అలవాటుపడి, తన సంపాదన సరిపోక సదాశివపేట, హైదరాబాద్‌, వరంగల్‌, రాచకొండ పరిధుల్లో దొంగతనాలకు పాల్పడినట్లు, గతంలో పలుమార్లు జైలుకు వెళ్లి వచ్చినట్లు వెల్లడైందని ఇన్‌స్పెక్టర్‌ తెలిపారు. నిందితుడిని కోర్టులో హాజరుపరిచి న్యాయపరమైన రిమాండ్‌కు తరలించారు. నిందితుడిని పట్టుకోవడంలో కీలకంగా వ్యవహరించిన క్రైమ్‌ టీమ్‌ హెడ్‌ కానిస్టేబుల్‌ రామకృష్ణ, కానిస్టేబుళ్లు వెంకటేశం, అమానుల్లా, నహీద్‌ పాషా, వీరేశంలను ఇన్‌స్పెక్టర్‌ వెంకటేష్‌ అభినందించారు.