అక్టోబర్‌ 11, 12 తేదీల్లో హైదరాబాద్‌లో భేటీ

సమావేశాలను జయప్రదం చేయండి: వరికుప్పల వెంకన్న. భారత మార్క్సిస్టు కమ్యూనిస్టు పార్టీ ఐక్య (ఎంసీపీఐ(యు)) తెలంగాణ రాష్ట్ర కమిటీ సమావేశాలు అక్టోబర్‌ 11, 12 తేదీల్లో హైదరాబాద్‌లోని ఓంకార్‌ భవన్‌, బి.ఎన్‌.రెడ్డి హాలులో నిర్వహించనున్నట్లు పార్టీ రాష్ట్ర కార్యదర్శివర్గ సభ్యుడు వరికుప్పల వెంకన్న తెలిపారు.

ఈ సందర్భంగా ఆయన మాట్లాడుతూ.. రాష్ట్ర ప్రభుత్వం ఎన్నికల ముందు ప్రజలకు ఇచ్చిన హామీలను అమలు చేయడం లేదని విమర్శించారు. ప్రభుత్వం అనుసరిస్తున్న విధానాలకు వ్యతిరేకంగా ప్రజా ఉద్యమాలు నిర్వహించేందుకు సమావేశాల్లో భవిష్యత్తు కార్యాచరణను రూపొందించనున్నట్లు వెల్లడించారు.

ఈ సమావేశాలకు పార్టీ జాతీయ ప్రధాన కార్యదర్శి కామ్రేడ్‌ మద్దికాయల అశోక్‌ ఓంకార్‌, తెలంగాణ రాష్ట్ర ప్రధాన కార్యదర్శి కామ్రేడ్‌ గాదగోని రవి ముఖ్య అతిథులుగా హాజరుకానున్నట్లు వెంకన్న తెలిపారు. పార్టీ రాష్ట్ర కార్యదర్శివర్గ సభ్యులు, రాష్ట్ర కమిటీ సభ్యులు, వివిధ జిల్లాల కార్యదర్శులు సమావేశాల్లో పాల్గొననున్నారని పేర్కొన్నారు.

రాష్ట్ర ప్రజల సమస్యలపై భవిష్యత్తు పోరాటాలకు దిశానిర్దేశం చేసే ఈ సమావేశాలను జయప్రదం చేయాలని వరికుప్పల వెంకన్న పిలుపునిచ్చారు.