యాదాద్రి–V జోన్‌ స్థాయి ఎంపికలు ప్రారంభించిన ఎస్పీ శరత్ చంద్ర పవార్.

నల్లగొండ: పోలీస్ సిబ్బందిలో దాగి ఉన్న క్రీడా ప్రతిభను వెలికితీసి, రాష్ట్రస్థాయి పోటీలకు ఉత్తమ క్రీడాకారులను ఎంపిక చేయడమే లక్ష్యంగా 5వ తెలంగాణ పోలీస్ స్పోర్ట్స్ అండ్ గేమ్స్ మీట్–2026కు జోనల్ స్థాయి ఎంపికలు నిర్వహించారు. శనివారం నల్లగొండ జిల్లా పోలీస్ కార్యాలయంలో యాదాద్రి–V జోన్‌ స్థాయి ఎంపికలను జిల్లా ఎస్పీ శరత్ చంద్ర పవార్ ఐపీఎస్ ప్రారంభించారు.

పోలీస్ విధులతోపాటు క్రీడల్లోనూ రాణించడం ద్వారా శారీరక దృఢత్వం, క్రమశిక్షణ, సమయపాలన, ఆత్మవిశ్వాసం పెంపొందుతాయని ఎస్పీ పేర్కొన్నారు. ఎంపికైన క్రీడాకారులు రాష్ట్రస్థాయి పోటీల్లో ప్రతిభ చాటుతూ పోలీస్ శాఖకు మంచి పేరు తీసుకురావాలని ఆకాంక్షించారు.

తెలంగాణ పోలీస్ శాఖ ఆధ్వర్యంలో నిర్వహించే పోటీల్లో భాగంగా క్లస్టర్‌–D పోటీలు నవంబర్‌ 3 నుంచి 5 వరకు వరంగల్‌ పోలీస్‌ కమిషనరేట్‌ పరిధిలో, క్లస్టర్‌–E పోటీలు నవంబర్‌ 25 నుంచి 28 వరకు నిజామాబాద్‌ పోలీస్‌ కమిషనరేట్‌ పరిధిలో జరగనున్నాయి. వివిధ క్రీడాంశాల్లో పురుషులు, మహిళలకు పోటీలు నిర్వహించనున్నారు.

జోనల్‌ స్థాయి ఎంపికల్లో క్రీడాకారుల ప్రతిభ, నైపుణ్యం, శారీరక సామర్థ్యాన్ని పరిశీలించి ఉత్తములను ఎంపిక చేశారు. కార్యక్రమంలో అడిషనల్‌ ఎస్పీ రమేష్‌, డీఎస్పీ శ్రీనివాసరావు, ఆర్‌ఐలు సంతోష్‌, హరిబాబు, శ్రీనుతోపాటు పోలీస్‌ క్రీడాకారులు పాల్గొన్నారు.