భువనగిరి, అక్టోబర్ 15: తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగను పురస్కరించుకుని యాదాద్రి భువనగిరి జిల్లా కేంద్రంలోని సుందరయ్య భవనంలో ఎన్‌పీఆర్‌డీ మహిళా విభాగం ఆధ్వర్యంలో గురువారం బతుకమ్మ ఆటపాటల కార్యక్రమాన్ని ఘనంగా నిర్వహించారు. మహిళలు బతుకమ్మలను పేర్చి, పాటలు పాడుతూ ఉత్సాహంగా వేడుకల్లో పాల్గొన్నారు.

మహిళల ఐక్యతకు ప్రతీక బతుకమ్మ

ఈ సందర్భంగా ఎన్‌పీఆర్‌డీ జిల్లా ప్రధాన కార్యదర్శి వనం ఉపేందర్, జిల్లా మహిళా విభాగం కన్వీనర్ కొత్త లలిత మాట్లాడుతూ.. బతుకమ్మ పండుగ మహిళల ఐక్యతకు, ఆత్మగౌరవానికి ప్రతీకగా నిలుస్తోందన్నారు. తెలంగాణ ప్రజల జీవన విధానంలో ఈ పండుగకు ప్రత్యేక స్థానం ఉందని పేర్కొన్నారు. వికలాంగ మహిళలు అన్ని రంగాల్లో రాణించాలని, తమ హక్కుల సాధన కోసం ఐక్యంగా ఉద్యమించాలని పిలుపునిచ్చారు.

సమాన అవకాశాలు కల్పించాలి

వికలాంగ మహిళలు ఎదుర్కొంటున్న సమస్యలను ప్రభుత్వం పరిష్కరించాలని, వారికి సమాన అవకాశాలు కల్పించాలని కోరారు. మహిళల్లో ఐక్యతా భావాన్ని, ఉత్సాహాన్ని పెంపొందించడమే బతుకమ్మ ఆటపాటల కార్యక్రమం లక్ష్యమని తెలిపారు. కార్యక్రమంలో మహిళా విభాగం జిల్లా నాయకురాళ్లు మంజుల, ఇందు, రాణి, ప్రశాంతి, నరసమ్మ, నాగమణి తదితరులు పాల్గొన్నారు.