సంగారెడ్డి జిల్లా నారాయణఖేడ్ సబ్‌డివిజన్ డీఎస్పీ కార్యాలయంలో రైటర్‌గా విధులు నిర్వహిస్తున్న హెడ్ కానిస్టేబుల్ ప్రేమ్ కుమార్‌కు జిల్లా ఎస్పీ పరితోష్ పంకజ్ చేతుల మీదుగా ప్రశంసా పత్రం అందజేశారు. బుధవారం జిల్లా కేంద్రంలోని ఎస్పీ కార్యాలయంలో ప్రేమ్ కుమార్ ఈ ప్రశంసా పత్రాన్ని అందుకున్నారు. విధుల పట్ల బాధ్యతాయుతంగా వ్యవహరిస్తూ పోలీసు శాఖలో తనకు అప్పగించిన పనులను సమర్థవంతంగా నిర్వహించినందుకు ఈ గుర్తింపు లభించింది. ఈ సందర్భంగా ప్రేమ్ కుమార్ మాట్లాడుతూ, తన సేవలను గుర్తించి ప్రశంసా పత్రం అందించడం సంతోషంగా ఉందని తెలిపారు. ఈ ప్రశంసా పత్రం అందుకోవడంలో సహకరించిన డీఎస్పీతో పాటు సీఐలు, ఎస్ఐలకు ప్రత్యేక కృతజ్ఞతలు తెలియజేశారు. భవిష్యత్తులోనూ మరింత బాధ్యతతో విధులు నిర్వహిస్తూ పోలీసు శాఖకు మంచి పేరు తీసుకురావడానికి కృషి చేస్తానని పేర్కొన్నారు.