కారు ధ్వంసం.. తృటిలో తప్పిన ప్రమాదం.

రెండు కిలోమీటర్ల మేర నిలిచిన వాహనాలు.

చిట్యాల: హైదరాబాద్‌–విజయవాడ జాతీయ రహదారిపై పెద్దకాపర్తి ఫ్లైఓవర్‌ వద్ద గురువారం రోడ్డు ప్రమాదం చోటుచేసుకుంది. హైదరాబాద్‌ నుంచి ఖమ్మం వెళ్తున్న కారును సూర్యాపేట డిపోకు చెందిన ఎలక్ట్రిక్‌ బస్సు వెనుక నుంచి ఢీకొట్టింది. ఈ ఘటనలో కారు తీవ్రంగా దెబ్బతిన్నప్పటికీ, ఎవరికీ ఎలాంటి గాయాలు కాకపోవడంతో అంతా ఊపిరి పీల్చుకున్నారు.

ప్రమాదం అనంతరం ధ్వంసమైన కారును రహదారిపై నుంచి పక్కకు తొలగించే క్రమంలో వాహనాల రాకపోకలకు అంతరాయం ఏర్పడింది. దీంతో జాతీయ రహదారిపై సుమారు రెండు కిలోమీటర్ల మేర వాహనాలు నిలిచిపోయి ట్రాఫిక్‌ స్తంభించింది. వాహనదారులు కొంతసేపు ఇబ్బందులు ఎదుర్కొన్నారు.