శాంతిభద్రతల పరిరక్షణ మరియు నేరాల నియంత్రణలో భాగంగా ఉన్నతాధికారుల ఆదేశాల మేరకు అనంతగిరి పోలీస్ స్టేషన్ పరిధిలో విస్తృతంగా వాహనాల తనిఖీలు చేపట్టారు. అనంతగిరి సబ్-ఇన్స్పెక్టర్ ఆధ్వర్యంలో పోలీస్ సిబ్బంది శుక్రవారం రాత్రి అనంతగిరి మండలం బొజ్జగూడెం తండా ఫ్లైఓవర్ వద్ద ముమ్మరంగా నాకాబందీ (వాహనాల తనిఖీలు) నిర్వహించారు.ఈ తనిఖీలలో భాగంగా ఫ్లైఓవర్ మీదుగా వెళ్లే అన్ని రకాల వాహనాలను నిలిపివేసి, డ్రైవింగ్ లైసెన్స్, ఆర్సీ బుక్, ఇన్సూరెన్స్ మరియు పొల్యూషన్ వంటి సర్టిఫికెట్లను క్షుణ్ణంగా పరిశీలించారు. ట్రాఫిక్ నిబంధనలు ఉల్లంఘించిన, సరైన పత్రాలు లేని వాహనదారులకు చట్టప్రకారం జరిమానాలు విధించారు.ఈ సందర్భంగా ఎస్సై మాట్లాడుతూ.. ప్రతి ఒక్కరూ వాహన చట్టాలను గౌరవించాలని, హెల్మెట్ మరియు సీట్ బెల్ట్ తప్పనిసరిగా ధరించాలని కోరారు. మైనర్లకు వాహనాలు ఇస్తే తల్లిదండ్రులపై చట్టపరమైన చర్యలు ఉంటాయని హెచ్చరించారు. నేరాల అదుపునకు, రోడ్డు ప్రమాదాల నివారణకు ప్రజలు పోలీసులకు సహకరించాలని ఆయన విజ్ఞప్తి చేశారు.