గడ్డిఅన్నారం డివిజన్‌ వివేకానందనగర్‌ బస్‌స్టాండ్‌ సమీపంలో ఈనెల 18న నిర్వహించనున్న సద్దుల బతుకమ్మ సంబరాల పోస్టర్లను ఎల్బీనగర్‌ ఎమ్మెల్యే దేవిరెడ్డి సుధీర్‌రెడ్డి గురువారం ఆవిష్కరించారు. మాజీ కార్పొరేటర్‌ భవాని ప్రవీణ్‌కుమార్‌ ఆధ్వర్యంలో ఈ వేడుకలు జరగనున్నాయి. ఈ సందర్భంగా భవాని ప్రవీణ్‌కుమార్‌ను ఎమ్మెల్యే శాలువాతో సన్మానించారు.

ఈ సందర్భంగా ఎమ్మెల్యే సుధీర్‌రెడ్డి మాట్లాడుతూ.. ఈనెల 18న జరిగే సద్దుల బతుకమ్మ సంబరాలకు తాను ముఖ్య అతిథిగా హాజరవుతానని తెలిపారు. డివిజన్‌ పరిధిలోని మహిళలు, కాలనీవాసులు పెద్ద సంఖ్యలో పాల్గొని వేడుకలను విజయవంతం చేయాలని కోరారు. కార్యక్రమంలో గడ్డిఅన్నారం బీఆర్‌ఎస్‌ యువజన విభాగం నాయకులు, కాలనీల ప్రతినిధులు, యువజన సంఘాల సభ్యులు పాల్గొన్నారు.