17 కీలక కేసుల ఛేదన.. మల్కాజిగిరి పోలీసులకు డీజీపీ ప్రశంసలు

మల్కాజిగిరి, అక్టోబర్‌ 15:

నేరాల నియంత్రణకు పటిష్ఠ చర్యలు తీసుకోవాలని తెలంగాణ డీజీపీ సీవీ ఆనంద్‌ పోలీసు అధికారులను ఆదేశించారు. గురువారం మల్కాజిగిరి పోలీస్‌ కమిషనరేట్‌ కార్యాలయాన్ని సందర్శించిన ఆయన.. కమిషనరేట్‌ పరిధిలో నేరాల నియంత్రణ, కేసుల దర్యాప్తు, పోలీసుల పనితీరుపై సమీక్ష నిర్వహించారు.

రాత్రి వేళల్లో పెట్రోలింగ్‌ ముమ్మరం చేయడంతోపాటు బీట్‌ వ్యవస్థను బలోపేతం చేయాలని సూచించారు. ప్రజల్లో భద్రతాభావం కల్పించేలా పోలీసులు అప్రమత్తంగా ఉండాలన్నారు. నేరాల నియంత్రణ, దర్యాప్తులో ఆధునిక సాంకేతిక పరిజ్ఞానాన్ని వినియోగించుకోవాలని, సీసీటీఎన్‌ఎస్‌లో కేసుల వివరాలను ఎప్పటికప్పుడు నమోదు చేయాలని ఆదేశించారు. కేసుల పురోగతిని నిరంతరం పర్యవేక్షించాలని సూచించారు.

24 గంటల్లో కేసు ఛేదన

ప్రస్తుత ఏడాదిలో నమోదైన 17 కీలక కేసులను ఛేదించిన మల్కాజిగిరి పోలీసులను డీజీపీ అభినందించారు. ఇటీవల చిన్నారి కిడ్నాప్‌, హత్య కేసును 24 గంటల్లో ఛేదించడంపై ప్రత్యేకంగా ప్రశంసించారు. కీలక కేసుల్లో నిందితులకు శిక్షలు పడేలా సమర్థవంతమైన దర్యాప్తు చేపట్టాలని సూచించారు. ఆధారాల సేకరణ, వృత్తి నైపుణ్యం, కేసులపై నిరంతర పర్యవేక్షణతో న్యాయం జరిగేలా చూడాలన్నారు.

పోలీసులకు నిరంతర శిక్షణ, నైపుణ్యాభివృద్ధి అవసరమని పేర్కొన్నారు. విధుల్లో ఆధునిక సాంకేతికతను వినియోగించుకుంటూ వృత్తి నైపుణ్యం, జవాబుదారీతనంతో పనిచేయాలని సూచించారు. అనంతరం అధికారుల నుంచి సమస్యలు, వినతులను స్వీకరించి, వాటిని పరిశీలించి తగిన చర్యలు తీసుకుంటామని హామీ ఇచ్చారు.

సమావేశంలో మల్కాజిగిరి పోలీస్‌ కమిషనర్‌ బి. సుమతి ఐపీఎస్‌తోపాటు డీసీపీలు, అదనపు డీసీపీ, ఏసీపీలు, ఇన్‌స్పెక్టర్లు పాల్గొన్నారు.