నారాయణఖేడ్ నియోజకవర్గంలో కంగ్టి మండలం సుక్కల్తీర్థం గ్రామ శివారులో కంది పంట సాగు చేస్తున్న రైతులకు వ్యవసాయ విస్తీర్ణధికారి సంతోష్ అధిక దిగుబడి సాధించే పద్ధతులపై అవగాహన కల్పించారు. కంది మొక్కల్లో సరైన సమయంలో ‘కొనల కత్తిరింపు’ (చిగుళ్లు గిల్లడం) చేయడం వల్ల మొక్క పైకి ఎక్కువగా పెరగకుండా పక్క కొమ్మలు విస్తరించి గుబురుగా పెరుగుతాయని తెలిపారు. దీంతో పూత, కాయల సంఖ్య పెరిగి దిగుబడి మెరుగుపడే అవకాశం ఉంటుందని వివరించారు. విత్తిన 30–45 రోజుల మధ్య మొక్క శాఖీయ ఎదుగుదల దశలో ఉన్నప్పుడు పైభాగంలోని చిగుళ్లను గిల్లాలని, అవసరాన్ని బట్టి 60–70 రోజుల మధ్య మరోసారి పక్క కొమ్మల కొనలను గిల్లవచ్చని సూచించారు. అయితే పూత దశ ప్రారంభమైన తర్వాత కొనలను కత్తిరించకూడదని, శాఖీయ ఎదుగుదల దశలోనే ఈ ప్రక్రియను పూర్తి చేయాలని రైతులకు సూచించారు. చిన్నపాటి యాజమాన్య పద్ధతిగా కొనల కత్తిరింపును పాటించడం ద్వారా కంది పంటలో మంచి దిగుబడి సాధించేందుకు అవకాశం ఉంటుందని సంతోష్ తెలిపారు.