నల్గొండ,

ముస్లిం మైనార్టీలకు రిజర్వేషన్లతో పాటు నాణ్యమైన విద్య అందించడమే రాష్ట్ర ప్రభుత్వ లక్ష్యమని రాష్ట్ర రోడ్లు, భవనాలు, సినిమాటోగ్రఫీ శాఖ మంత్రి కోమటిరెడ్డి వెంకటరెడ్డి తెలిపారు. నల్గొండ పట్టణంలోని మాన్యం చెల్క ప్రాంతంలో రూ.44 లక్షల వ్యయంతో నిర్మించనున్న ఉర్దూ మీడియం ప్రైమరీ స్కూల్ భవన నిర్మాణానికి బుధవారం ఆయన శంకుస్థాపన చేశారు.

ఈ సందర్భంగా మంత్రి మాట్లాడుతూ ఉర్దూ మీడియం పాఠశాల నిర్మాణ పనులు వెంటనే ప్రారంభమవుతాయని, అవసరమైతే రూ.కోటి వరకు ఖర్చు చేసి అత్యుత్తమ భవనాన్ని నిర్మిస్తామని తెలిపారు. విద్య, వైద్య రంగాలకు రాష్ట్ర ప్రభుత్వం అత్యంత ప్రాధాన్యత ఇస్తోందన్నారు.

గతంలో వైఎస్సార్ ముఖ్యమంత్రిగా ఉన్న సమయంలో ఉర్దూను రెండో భాషగా గుర్తించడంతో పాటు సచార్ కమిటీ సిఫారసుల మేరకు ముస్లిం మైనార్టీలకు నాలుగు శాతం రిజర్వేషన్లు కల్పించిన విషయాన్ని గుర్తు చేశారు. ప్రస్తుతం విద్య, ఉద్యోగాల్లో ముస్లింలకు అవకాశాలు పెంచడంతో పాటు నాణ్యమైన విద్య అందించేందుకు చర్యలు తీసుకుంటున్నట్లు చెప్పారు.

ఏఐ విద్యపై ప్రత్యేక దృష్టి

ప్రతీక్ మెమోరియల్ ప్రభుత్వ జూనియర్ కళాశాలలో కంప్యూటర్ విద్యతో పాటు కృత్రిమ మేధ (ఏఐ) శిక్షణ అందిస్తున్నామని, ముస్లిం విద్యార్థులు ఈ అవకాశాన్ని సద్వినియోగం చేసుకోవాలని సూచించారు. బొట్టుగూడ పాఠశాల తరహాలోనే ఉర్దూ మీడియం పాఠశాలను కూడా అభివృద్ధి చేస్తామని తెలిపారు.

షాదీఖానాకు రూ.10 కోట్లు

ముస్లిం మైనార్టీల కోసం రూ.10 కోట్ల వ్యయంతో షాదీఖానా నిర్మించనున్నట్లు మంత్రి ప్రకటించారు. పేద ముస్లిం కుటుంబాలకు ఇందిరమ్మ ఇళ్లు మంజూరు చేయడంతో పాటు అవసరమైతే స్థలం కల్పించి ఇళ్లు నిర్మించి ఇస్తామని హామీ ఇచ్చారు.

నల్గొండ మేయర్ బుర్రి చైతన్య శ్రీనివాస్ రెడ్డి మాట్లాడుతూ ప్రభుత్వం విద్య, వైద్య రంగాలకు అధిక ప్రాధాన్యత ఇస్తోందన్నారు. జిల్లా కలెక్టర్ బి. చంద్రశేఖర్ మాట్లాడుతూ ఉర్దూ మీడియం పాఠశాల నిర్మాణాన్ని త్వరితగతిన పూర్తి చేసేందుకు చర్యలు తీసుకుంటామని తెలిపారు.