కర్ణాటక రాష్ట్ర మంత్రివర్గ విస్తరణలో మూడోసారి క్యాబినెట్ మంత్రిగా అవకాశం దక్కించుకున్న బాల్కి ఎమ్మెల్యే, ఆల్ ఇండియా వీరశైవ మహాసభ అధ్యక్షుడు ఈశ్వర్ ఖండ్రేను సంగారెడ్డి జిల్లా వీరశైవ లింగాయత్ సమాజ నాయకులు మర్యాదపూర్వకంగా కలిసి శుభాకాంక్షలు తెలిపారు. ఈ సందర్భంగా జిల్లా మాజీ ప్రధాన కార్యదర్శి అనిశెట్టి జయప్రకాష్ మాట్లాడుతూ వీరశైవ లింగాయత్ సమాజానికి చెందిన నాయకుడిగా ఈశ్వర్ ఖండ్రే మరోసారి క్యాబినెట్ హోదా పొందడం గర్వకారణమన్నారు. ప్రజాసేవ, సమాజ అభ్యున్నతి పట్ల ఆయన చూపుతున్న కృషికి గుర్తింపుగానే ఈ అవకాశం లభించిందని పేర్కొన్నారు. అలాగే ఈ గౌరవప్రదమైన అవకాశాన్ని కల్పించిన డి.కె. శివకుమార్‌కు ప్రత్యేక ధన్యవాదాలు తెలిపారు. ఈశ్వర్ ఖండ్రే తన పదవిలో మరింత సమర్థవంతంగా పనిచేస్తూ ప్రజా సంక్షేమం, రాష్ట్ర అభివృద్ధి, వీరశైవ లింగాయత్ సమాజ పురోగతికి విశేష సేవలు అందించాలని ఆకాంక్షించారు. ఈ కార్యక్రమంలో తెలంగాణ వీరశైవ లింగాయత్ సమాజ రాష్ట్ర నాయకులు సిహెచ్ బసవరాజ్, సులగంటి సిద్ధేశ్వర్, శివరాజ్ పాటిల్, సదాశివపేట అధ్యక్షుడు గందిగా రాజు, జిల్లా యువజన అధ్యక్షుడు బుగ్గన మల్లికార్జున్ తదితరులు పాల్గొన్నారు.