మహిళల భద్రతే పోలీసుల ప్రధాన ధ్యేయమని, ఎలాంటి వేధింపులకు గురైనా భయాందోళన చెందకుండా వెంటనే పోలీసులను ఆశ్రయించాలని చౌటుప్పల్ ఇన్‌స్పెక్టర్ ఆఫ్ పోలీస్ జి.మన్మథకుమార్ సూచించారు. చౌటుప్పల్ పోలీస్ స్టేషన్ పరిధిలోని ధర్మోజీగూడెం గ్రామంలో గల జెన్‌టెక్ కంపెనీలో గురువారం మహిళల భద్రత, రక్షణపై ప్రత్యేక అవగాహన కార్యక్రమం నిర్వహించారు.​ఈ సందర్భంగా ఆయన మాట్లాడుతూ... మహిళలు విధులు నిర్వహించే సమయంలో తీసుకోవాల్సిన జాగ్రత్తలను వివరించారు. ఈవ్‌టీజింగ్, లైంగిక, సైబర్ వేధింపుల నిరోధానికి ఉన్న చట్టాల గురించి అవగాహన కల్పించారు. 'షి టీమ్స్', ఉమెన్ సేఫ్టీ, సీడబ్ల్యూడీ (క్రైమ్ ఎగైనెస్ట్ ఉమెన్) విభాగాల ద్వారా అందుబాటులో ఉన్న రక్షణ సేవలను, అత్యవసర సమయాల్లో పోలీసుల నుంచి పొందే సాయాన్ని తెలియజేశారు. ​మహిళల భద్రతకు చౌటుప్పల్ పోలీసులు నిరంతరం అందుబాటులో ఉంటారని, పని ప్రదేశాల్లో లేదా వెలుపల ఏవైనా సమస్యలు ఎదురైతే నిర్భయంగా పోలీసుల దృష్టికి తీసుకురావాలని ఈ సందర్భంగా ఇన్‌స్పెక్టర్ స్పష్టం చేశారు.