అంబేద్కర్ ఓపెన్ యూనివర్సిటీలో ఘనంగా 92వ జయంతివేడుకలు

తెలంగాణ ఉద్యమానికి సిద్ధాంతపరమైన దిశానిర్దేశం చేసిన మహనీయుడు ప్రొఫెసర్ కొత్తపల్లి జయశంకర్ అని బుద్ధవనం ప్రాజెక్ట్ ప్రత్యేక అధికారి, దళిత అధ్యయన కేంద్రం వ్యవస్థాపక ఛైర్మన్ మల్లేపల్లి లక్ష్మయ్య అన్నారు. తెలంగాణ సిద్ధాంతకర్త, ప్రముఖ విద్యావేత్త ప్రొ. జయశంకర్ 92వ జయంతి సందర్భంగా Dr. B.R. Ambedkar Open Universityలో నిర్వహించిన స్మారకోపన్యాస కార్యక్రమంలో ఆయన ముఖ్య అతిథిగా పాల్గొని "ప్రొఫెసర్ జయశంకర్ ఆలోచనలు – సామాజిక ఉద్యమాలు" అంశంపై ప్రసంగించారు.

ఉద్యమాన్ని నిర్మించడం, ప్రజల్లో భావజాలాన్ని విస్తరించడం, ఆ తరువాత రాజకీయ ప్రక్రియ ద్వారా లక్ష్యాన్ని సాధించడం అనే స్పష్టమైన సిద్ధాంతాన్ని ప్రొ. జయశంకర్ ప్రతిపాదించారని మల్లేపల్లి లక్ష్మయ్య పేర్కొన్నారు. ప్రత్యేక తెలంగాణ రాష్ట్ర సాధనలో ఆయన ఆలోచనలు కీలక పాత్ర పోషించాయని, అందుకే తెలంగాణ ప్రజలు ఆయనను సిద్ధాంతకర్తగా గౌరవిస్తారని చెప్పారు. సమానత్వం, సామాజిక న్యాయం, ప్రజాస్వామ్య విలువలతో కూడిన సమాజ నిర్మాణానికి ఆయన జీవితాంతం కృషి చేశారని, నేటి యువత ఆయన ఆదర్శాలను అనుసరించాలని సూచించారు.

కార్యక్రమానికి అధ్యక్షత వహించిన వైస్‌ ఛాన్సలర్ ప్రొ. ఘంటా చక్రపాణి మాట్లాడుతూ విద్యార్థి దశ నుంచి చివరి శ్వాస వరకు తెలంగాణ రాష్ట్ర సాధనే ప్రొ. జయశంకర్ జీవితాశయమని అన్నారు. తెలంగాణ ఉద్యమంలోని అన్ని దశల్లో ఆయన చురుకైన పాత్ర పోషించారని, అదే అనుభవం తుది దశ ఉద్యమానికి బలాన్నిచ్చిందన్నారు. అధ్యాపకుడిగా, రిజిస్ట్రార్‌గా, వైస్‌ ఛాన్సలర్‌గా బాధ్యతలు నిర్వహించినప్పటికీ ప్రజా సమస్యలపై నిరంతరం గళమెత్తారని కొనియాడారు. భారత రాజ్యాంగంలోని ఆర్టికల్–3 ద్వారానే తెలంగాణ రాష్ట్రం ఏర్పడిందని గుర్తుచేశారు.

విశ్వవిద్యాలయ రిజిస్ట్రార్ డా. ఎల్. విజయకృష్ణారెడ్డి కార్యక్రమం ఆవశ్యకతను వివరించి ముఖ్య అతిథిని సభకు పరిచయం చేశారు. అంతకుముందు డా. బి.ఆర్. అంబేద్కర్, ప్రొ. కె. జయశంకర్ చిత్రపటాలకు పుష్పాంజలి ఘటించి నివాళులర్పించారు.

ఈ కార్యక్రమంలో ప్రొ. రవీంద్రనాథ్ సోలమన్, ప్రొ. ఆనంద్ పవార్, ప్రొ. పల్లవి కాబ్డే, డా. వై. వెంకటేశ్వర్లు, ప్రొ. ఎన్. రజని, ప్రొ. ప్రమీలా కేతావత్, ప్రొ. చంద్రకళ, ప్రొ. మేరీసునందతో పాటు అన్ని విభాగాల డైరెక్టర్లు, డీన్లు, అధ్యాపకులు, అధ్యాపకేతర సిబ్బంది, ఉద్యోగ సంఘాల నాయకులు కాంతం ప్రేమ్ కుమార్, డా. యాకేష్ దైదా, మియా జాని, మంజుల, కె. పాండు తదితరులు పాల్గొన్నారు.