నేరేడుచర్ల పట్టణానికి చెందిన నరేష్ అనే జంతు ప్రేమికుడు కోదాడ పట్టణ ప్రాంతీయ పశువైద్యశాల ఎదురుగానే నివాసం ఉంటూ అరుదైన బ్లాక్ బెంగాల్ జాతి మేకను పెంచుకుంటున్నారు. అది ఆడుతూ పాడుతూ ఇంట్లో నుండి బైటకు రాగానే అటుగా వెళ్తున్న బైక్ తగిలి గూడ ఎముక విరిగింది. అసలే అరుదైన ఔషధ గుణాలున్న పాలిచ్చే జాతి మేక, అందులోనూ రెండు మాసాల గర్భంతో ఉండడం తో దానిని ఎలాగైనా బ్రతికించుకోవాలనే తపనతో తెలిసిన వారిద్వారా ఎముకల శస్త్ర చికిత్స నిమిత్తం బుధవారం కోదాడ ప్రాంతీయ పశువైద్యశాలకు మేకను తీసుకువచ్చారు.విరిగిన మేక కాలు ఎముకను పరీక్షించిన అసిస్టెంట్ డైరెక్టర్ డా పి పెంటయ్య కడుపులో పిల్ల కి ప్రమాదం నివారించడానికి జనరల్ మత్తు బదులు స్థానిక మత్తు మాత్రమే ఇచ్చి శస్త్ర చికిత్స నిర్వహించారు. బైక్ గట్టిగా తగలడంతో విరిగిన ఎముకలు ఒకదానిపై ఒకటి చేరి లోనికి పొడుచుకుని పోవడంతో రెండు చివరలను జతచేయడానికి అతికష్టంతో మూడు గంటల పాటు శ్రమించి ప్లేట్ మరియు రాడ్ అమర్చి విజయవంతంగా ఎముకలను అతికించి శస్త్ర చికిత్స ముగించారు.శస్త్ర చికిత్సలో వెటరినరీ అసిస్టెంట్ సర్జన్ డా సిరిపురపు సురేంద్ర, సిబ్బంది శివ, చంద్రకళ, సాగర్ పాల్గొన్నారు.