శ్రీ సత్యసాయి జిల్లా నల్లమాడ పోలీస్ స్టేషన్ పరిధిలోని రామాపురం గ్రామంలోని డా. బి.ఆర్. అంబేద్కర్ గురుకుల పాఠశాలలో పుట్టపర్తి శక్తి బృందం–2 ఆధ్వర్యంలో విద్యార్థులు, తల్లిదండ్రులు మరియు గ్రామస్తులకు అవగాహన కార్యక్రమం నిర్వహించారు.

ఈ సందర్భంగా పోక్సో (POCSO) చట్టం, బాల్య వివాహాల వల్ల కలిగే చట్టపరమైన పరిణామాలు, మైనర్ల ప్రేమ వ్యవహారాల వల్ల ఎదురయ్యే సమస్యలు మరియు వాటి న్యాయపరమైన పరిణామాలపై వివరంగా అవగాహన కల్పించారు.

18 సంవత్సరాల లోపు బాలికల విషయంలో తల్లిదండ్రులు ప్రత్యేక శ్రద్ధ వహించాలని, వారి రోజువారీ కార్యకలాపాలను గమనించాలని, ఒంటరిగా నిర్మానుష్య ప్రాంతాలకు పంపకుండా జాగ్రత్తలు తీసుకోవాలని సూచించారు.

అలాగే మహిళలు మరియు బాలికల భద్రత కోసం రూపొందించిన శక్తి యాప్ వినియోగం, అత్యవసర పరిస్థితుల్లో ఉపయోగపడే 112 (ఎమర్జెన్సీ), 181 (మహిళల హెల్ప్‌లైన్), 1098 (చైల్డ్ హెల్ప్‌లైన్), 1930 (సైబర్ మోసాల హెల్ప్‌లైన్) సేవల గురించి వివరించారు.

తమ గ్రామం లేదా పరిసర ప్రాంతాల్లో అనుమానాస్పద వ్యక్తులు లేదా అనుమానాస్పద కార్యకలాపాలు కనిపించిన వెంటనే 112కు సమాచారం అందించి పోలీసులకు సహకరించాలని ప్రజలకు విజ్ఞప్తి చేశారు.

ప్రజల్లో చట్టాలపై అవగాహన పెంపొందించడం, మహిళలు మరియు చిన్నారుల భద్రతను మరింత బలోపేతం చేయడం కోసం ఇటువంటి అవగాహన కార్యక్రమాలను జిల్లా పోలీసు శాఖ నిరంతరం నిర్వహిస్తుందని తెలిపారు.