మహిళలు, చిన్నారుల భద్రత మరియు నేరాల నివారణపై ప్రజల్లో చైతన్యం కల్పించేందుకు జిల్లా వ్యాప్తంగా శక్తి టీమ్ ఆధ్వర్యంలో అవగాహన కార్యక్రమం నిర్వహించారు.

ఈ సందర్భంగా గ్రామంలోని మహిళలు, చిన్నారులకు మహిళల భద్రత, చిన్నారుల రక్షణకు సంబంధించిన చట్టాలు మరియు జాగ్రత్తలపై వివరించారు. అలాగే చిన్నారులపై జరిగే నేరాలు, బాల్య వివాహాల దుష్పరిణామాలు, పోక్సో (POCSO) చట్టం, మిస్సింగ్ కేసులు, చైన్ స్నాచింగ్ ఘటనలు, గంజాయి మరియు ఇతర మాదకద్రవ్యాల వల్ల కలిగే ప్రమాదాల గురించి అవగాహన కల్పించారు.

అత్యవసర పరిస్థితుల్లో ప్రజలు వెంటనే పోలీసులను సంప్రదించేందుకు డయల్-100/112, మహిళల సహాయ కేంద్రం-181, సైబర్ క్రైమ్ హెల్ప్‌లైన్-1930, చైల్డ్ హెల్ప్‌లైన్-1098 నంబర్ల వినియోగంపై వివరించారు.

అలాగే మహిళల భద్రత కోసం రాష్ట్ర ప్రభుత్వం అందుబాటులో ఉంచిన శక్తి యాప్ ప్రాముఖ్యతను తెలియజేసి, కార్యక్రమానికి హాజరైన మహిళలతో శక్తి యాప్‌ను డౌన్‌లోడ్ చేయించారు.

ప్రతి ఒక్కరూ చట్టాలను గౌరవిస్తూ, ఎలాంటి నేర కార్యకలాపాలకు పాల్పడకుండా సమాజంలో శాంతి భద్రతల పరిరక్షణకు సహకరించాలని శక్తి టీమ్ సభ్యులు సూచించారు.