కంగ్టి మండల కేంద్రంలో రాత్రివేళ అత్యవసర వైద్య సేవలు అందుబాటులో ఉండేలా ప్రభుత్వ, ప్రైవేట్ ఆసుపత్రుల అధికారులు ప్రత్యేక చర్యలు తీసుకోవాలని టి.వై.జె.ఎఫ్. జిల్లా జనరల్ సెక్రెటరీ షేక్ జలీల్ కోరారు. రాత్రి సమయంలో అనారోగ్యం, ప్రమాదాలు, గర్భిణులు, చిన్నపిల్లలకు అత్యవసర పరిస్థితులు ఎదురైనప్పుడు వెంటనే వైద్యం అందక ప్రజలు ఇబ్బందులు పడుతున్నారని తెలిపారు. ప్రభుత్వ ఆసుపత్రిలో అత్యవసర సేవలు నిరంతరం అందుబాటులో ఉండేలా అధికారులు పర్యవేక్షించాలని, అలాగే ప్రైవేట్ ఆసుపత్రుల యాజమాన్యాలు కూడా బాధ్యతగా వ్యవహరించి కనీసం ఒక ఆసుపత్రి రాత్రివేళ వైద్యులు, సిబ్బందితో అందుబాటులో ఉండేలా షిఫ్ట్ విధానం ఏర్పాటు చేయాలని సూచించారు. ప్రజల ప్రాణాలను దృష్టిలో పెట్టుకుని ప్రభుత్వ, ప్రైవేట్ ఆసుపత్రులు సమన్వయంతో పనిచేస్తే అత్యవసర సమయంలో ఎంతోమంది ప్రాణాలను కాపాడే అవకాశం ఉంటుందని పేర్కొన్నారు. వైద్యం కోసం దూర ప్రాంతాలకు వెళ్లాల్సిన పరిస్థితి లేకుండా కంగ్టి మండల కేంద్రంలోనే 24 గంటల అత్యవసర వైద్య సేవలు అందుబాటులో ఉండేలా చర్యలు తీసుకోవాలని షేక్ జలీల్ కోరారు.