నారాయణఖేడ్ నియోజకవర్గంలో కల్హేర్ మండలం ఇందిరానగర్‌లో స్వయం సహాయక సంఘాల సభ్యులకు సంఘాల బలోపేతం, నిర్వహణ, మహిళల ఆర్థిక అభివృద్ధిపై ప్రత్యేక శిక్షణ కార్యక్రమం నిర్వహించారు. ఈ కార్యక్రమంలో సెర్ప్ ఎస్‌పీఎం బీమయ్య, డీపీఎం జాన్ కెన్నెడీ, ఏపీఎం శివకుమార్ పాల్గొని మహిళలకు పలు అంశాలపై అవగాహన కల్పించారు. సంఘ సమావేశాలను క్రమం తప్పకుండా నిర్వహించడం, పొదుపు పెంచుకోవడం, అంతర్గత రుణాలను సద్వినియోగం చేసుకోవడం, సంఘ రికార్డులను సక్రమంగా నిర్వహించడం, సభ్యులందరి భాగస్వామ్యంతో నిర్ణయాలు తీసుకోవడం వంటి అంశాలపై శిక్షణ ఇచ్చారు. స్వయం సహాయక సంఘాల ద్వారా మహిళలు ఆర్థికంగా స్వావలంబన సాధించి కుటుంబ ఆర్థిక పరిస్థితిని మెరుగుపరచుకోవాలని సూచించారు. ప్రభుత్వ పథకాలను సద్వినియోగం చేసుకుని సంఘాలను మరింత బలోపేతం చేసుకోవాలని అధికారులు తెలిపారు. కార్యక్రమంలో ఏపీఎం వంశీకృష్ణ, సీసీ కల్పన, సీఆర్‌పీలు సంధ్యారాణి, ప్రమీల, వీఓఏ శంకర్ నాయక్, వీఓ అధ్యక్షురాలు లక్ష్మీతో పాటు ఇందిరానగర్ స్వయం సహాయక సంఘాల సభ్యులు పాల్గొన్నారు.