నారాయణఖేడ్ నియోజకవర్గంలోని మానూర్ మండల పరిధిలోని పుల్కుర్తి గ్రామంలోని కస్తూర్బా గాంధీ బాలికల విద్యాలయం (కేజీబీవీ) హాస్టల్‌ను డిప్యూటీ కలెక్టర్ ప్రతిభ శేఖర్ ఆకస్మికంగా తనిఖీ చేశారు. ఈ సందర్భంగా హాస్టల్‌లో విద్యార్థినులకు ప్రభుత్వం అందిస్తున్న భోజనం, వసతి, తాగునీరు, పరిశుభ్రత, భద్రత, వైద్య సేవలను పరిశీలించి, విద్యార్థినులతో నేరుగా మాట్లాడి వారి సమస్యలను అడిగి తెలుసుకున్నారు. హాస్టల్‌లో ఎల్లప్పుడూ పరిశుభ్రమైన వాతావరణం ఉండేలా చూడాలని, నాణ్యమైన పోషకాహారంతో కూడిన భోజనం అందించాలని అధికారులను ఆదేశించారు. విద్యార్థినుల ఆరోగ్యం, విద్య, భద్రత విషయంలో ఎలాంటి నిర్లక్ష్యం ఉండకూడదని, ప్రభుత్వం కల్పిస్తున్న అన్ని సౌకర్యాలు ప్రతి విద్యార్థికి సక్రమంగా అందేలా క్రమం తప్పకుండా పర్యవేక్షించాలని సూచించారు. హాస్టల్ నిర్వహణలో లోపాలకు తావులేకుండా విద్యార్థుల సంక్షేమానికి ప్రాధాన్యత ఇవ్వాలని అధికారులకు స్పష్టం చేశారు.ఈ తనిఖీలో తహసీల్దార్ విష్ణు సాగర్,జూనియర్ అసిస్టెంట్ ఖాజా మైనోద్దీన్,ఎంపీడీఓ, హాస్టల్ ప్రిన్సిపాల్,పంచాయతీ కార్యదర్శి,సర్పంచ్‌తో పాటు సంబంధిత శాఖల అధికారులు పాల్గొన్నారు.