రామన్నపేట,

కేంద్ర, రాష్ట్ర ప్రభుత్వాలు యువతకు ఉద్యోగాలు కల్పించడంలో పూర్తిగా విఫలమయ్యాయని, ప్రభుత్వ శాఖల్లో ఖాళీగా ఉన్న లక్షలాది పోస్టులను వెంటనే భర్తీ చేయాలని సీపీఎం జిల్లా కార్యదర్శి ఎండీ జహంగీర్ డిమాండ్ చేశారు.

రామన్నపేట మండలం వెల్లంకి గ్రామంలో కూరెళ్ల నర్సింహాచారి అధ్యక్షతన నిర్వహించిన సీపీఎం మండల కమిటీ సమావేశంలో ఆయన ముఖ్య అతిథిగా పాల్గొని మాట్లాడారు. ప్రభుత్వ శాఖల్లో సంవత్సరాలుగా ఖాళీగా ఉన్న ఉద్యోగాలను భర్తీ చేయకుండా కాలయాపన చేయడం వల్ల నిరుద్యోగ యువత తీవ్ర నిరాశకు గురవుతోందని విమర్శించారు.

ప్రతి ఏడాది లక్షలాది మంది యువత చదువులు పూర్తి చేసి ఉద్యోగాల కోసం ఎదురుచూస్తున్నా, కేంద్రం, రాష్ట్రం తగిన ఉపాధి అవకాశాలు కల్పించడంలో ఘోరంగా విఫలమయ్యాయని అన్నారు. ఉద్యోగాల భర్తీలో జాప్యం, నోటిఫికేషన్ల విడుదలలో ఆలస్యం, పరీక్షల నిర్వహణలో నిర్లక్ష్యం కారణంగా యువత భవిష్యత్తు ప్రశ్నార్థకంగా మారిందని పేర్కొన్నారు.

ప్రభుత్వ శాఖల్లో ఖాళీగా ఉన్న పోస్టులను వెంటనే భర్తీ చేస్తే నిరుద్యోగ సమస్య తగ్గడంతో పాటు ప్రజలకు మెరుగైన సేవలు అందుతాయని అన్నారు. బీజేపీ ప్రభుత్వం ఏడాదికి రెండు కోట్ల ఉద్యోగాల హామీని అమలు చేయాలని, రాష్ట్ర ప్రభుత్వం రెండు లక్షల ప్రభుత్వ ఉద్యోగాలకు వెంటనే నోటిఫికేషన్లు విడుదల చేసి నియామకాలు చేపట్టాలని డిమాండ్ చేశారు.

ఈ డిమాండ్ల సాధన కోసం జూలై 15న హైదరాబాద్‌లోని ఇందిరా పార్క్ వద్ద నిర్వహించే సీపీఎం మహాధర్నాకు నిరుద్యోగ యువత, విద్యార్థులు, ప్రజలు భారీగా తరలివచ్చి విజయవంతం చేయాలని పిలుపునిచ్చారు.

సమావేశంలో సీపీఎం జిల్లా కార్యదర్శివర్గ సభ్యులు జల్లెల పెంటయ్య, మండల కార్యదర్శి బొడ్డుపల్లి వెంకటేశం, జిల్లా కమిటీ సభ్యుడు బల్గూరి అంజయ్య, మండల కార్యదర్శివర్గ సభ్యులు జంపాల అండాలు, కందుల హనుమంతు, మండల కమిటీ సభ్యులు ఆవనగంటి నగేష్, గన్నేబోయిన విజయభాస్కర్, గొరిగే సోములు, నాగటి ఉపేందర్, బొడిగే రజిత, తొలుపునూరి శ్రీనివాస్, శాఖ కార్యదర్శులు మునికుంట్ల లెనిన్, తాళ్లపల్లి జితేందర్, శానగొండ వెంకటేశ్వర్లు, గోగు లింగస్వామి, జోగుల ధనలక్ష్మి, కొమ్ము అంజమ్మ, నాగటి లక్ష్మణ్, అప్పం సురేందర్, ఆముద ఆంజనేయులు తదితరులు పాల్గొన్నారు.