చేనేత సహకార సంఘాలు బలోపేతంగా ఉంటేనే చేనేత కార్మికుల సంక్షేమం, ఉపాధి భద్రత సాధ్యమవుతుందని శ్రీ మార్కండేయ సిల్క్ చేనేత సహకార ఉత్పత్తి, విక్రయ సంఘం జనంపల్లి అధ్యక్షులు సంగిశెట్టి సుదర్శన్ అన్నారు. ప్రతి చేనేత వృత్తిదారుడు సహకార సంఘాలను పరిరక్షించి, అభివృద్ధికి తోడ్పడాల్సిన బాధ్యత ఉందని ఆయన పేర్కొన్నారు.

మండలంలోని జనంపల్లి చేనేత సహకార సంఘంలో నూతన కార్యవర్గ ప్రమాణ స్వీకారోత్సవ కార్యక్రమం ఘనంగా నిర్వహించారు. ఈ సందర్భంగా సంఘం అధ్యక్షులుగా సంగిశెట్టి సుదర్శన్, ఉపాధ్యక్షులుగా సంగిశెట్టి విజయలక్ష్మి, కార్యదర్శిగా వనం శంకర్, కోశాధికారిగా పున్న శ్రీధర్, డైరెక్టర్లుగా కర్ణాటక రమేష్, కైరంకొండ బిక్షం, సంగిశెట్టి గణేష్, సంగిశెట్టి కళమ్మ, సూరపల్లి మహాలక్ష్మిలు ప్రమాణ స్వీకారం చేశారు.

కార్యక్రమానికి హాజరైన గ్రామ సర్పంచ్ బండ సరోజ అంజిరెడ్డి, చేనేత వృత్తిదారులు, కార్మికులు నూతన కార్యవర్గ సభ్యులను శాలువాలతో సత్కరించి శుభాకాంక్షలు తెలిపారు. నూతన కార్యవర్గం చేనేత కార్మికుల సంక్షేమం, ఉపాధి అవకాశాల విస్తరణ, సహకార సంఘ అభివృద్ధికి కృషి చేయాలని ఆకాంక్షించారు.