ప్రభుత్వం ఫోటో, వీడియో గ్రాఫర్లకు సబ్సిడీపై రుణాలు అందించి వారి ఆర్థిక అభివృద్ధికి కృషి చేయాలని సదాశివపేట పట్టణ ఫోటోగ్రాఫర్ అసోసియేషన్ అధ్యక్షుడు నాగుల విజయ్ కుమార్ కోరారు. ప్రపంచ ఫోటోగ్రఫీ దినోత్సవాన్ని పురస్కరించుకుని బుధవారం సదాశివపేటలో అసోసియేషన్ ఆధ్వర్యంలో ఘనంగా వేడుకలు నిర్వహించి జెండాను ఆవిష్కరించారు. ఈ సందర్భంగా విజయ్ కుమార్ మాట్లాడుతూ కెమెరా కేవలం పరికరం మాత్రమే కాదని, అది ఫోటోగ్రాఫర్ల వృత్తికి గుర్తింపు అని అన్నారు. చరిత్రను భద్రపరిచే బాధ్యత ఫోటోగ్రాఫర్లపై ఉందన్నారు. యువ ఫోటోగ్రాఫర్లు ఆధునిక సాంకేతికతను నేర్చుకుని ఫోటోగ్రఫీతో పాటు వీడియో, డ్రోన్, ఎడిటింగ్, ఆల్బమ్ డిజైన్, సామాజిక మాధ్యమాల కంటెంట్, కృత్రిమ మేధస్సు వంటి నూతన రంగాల్లో నైపుణ్యాలు పెంచుకోవాలని సూచించారు. ఫోటోగ్రాఫర్ల ఐక్యతే తమ బలమని పేర్కొన్నారు. కార్యక్రమంలో ప్రధాన కార్యదర్శి ముదిగొండ జయచింతన్, కోశాధికారి కర్ణాకర్, ఉపాధ్యక్షులు కాషా సంగమేశ్వర్, వై. మహేష్, శివశంకర్, గొల్లపల్లి శ్రీనివాస్, రుమాండ్ల రాజు, బండారి సుభాష్, ఎం. సంతోష్, మల్లేష్ తదితరులు పాల్గొన్నారు.