హైదరాబాద్‌, ఆగస్టు 19: భవన నిర్మాణ అనుమతి ఫైల్‌ ప్రాసెస్‌ చేసేందుకు రూ.20 వేల లంచం తీసుకుంటూ జీహెచ్‌ఎంసీ టౌన్‌ ప్లానింగ్‌ సూపర్‌వైజర్‌ ఏసీబీ అధికారులకు చిక్కారు. చార్మినార్‌ జోన్‌ పరిధిలోని సంతోష్‌నగర్‌ సర్కిల్‌–25 టౌన్‌ ప్లానింగ్‌ విభాగంలో పనిచేస్తున్న సూపర్‌వైజర్‌ చి. ప్రభావతిని ఏసీబీ సిటీ రేంజ్‌–1 అధికారులు బుధవారం రెడ్‌హ్యాండెడ్‌గా పట్టుకున్నారు.

ఏసీబీ అధికారులు తెలిపిన వివరాల ప్రకారం.. భవన నిర్మాణ అనుమతికి సంబంధించిన ఫైల్‌ను ప్రాసెస్‌ చేసి బిల్డింగ్‌ పర్మిట్‌ ఆర్డర్‌, వర్క్‌ కమencement లెటర్‌ జారీ చేసేందుకు ఫిర్యాదుదారుడిని ప్రభావతి రూ.20 వేల లంచం డిమాండ్‌ చేసినట్లు ఆరోపణలు ఉన్నాయి. ఈ క్రమంలో లంచం మొత్తాన్ని స్వీకరిస్తుండగా ఏసీబీ అధికారులు దాడి చేసి ఆమెను అదుపులోకి తీసుకున్నారు. ఆమె సూచన మేరకు రూ.20 వేల లంచం మొత్తాన్ని స్వాధీనం చేసుకున్నారు.

విధులను సక్రమంగా నిర్వర్తించకుండా అక్రమ ప్రయోజనం పొందేందుకు ప్రయత్నించినట్లు ఏసీబీ అధికారులు పేర్కొన్నారు. అనంతరం నిందితురాలిని నాంపల్లిలోని SPE & ACB కేసుల I అదనపు ప్రత్యేక న్యాయస్థానంలో హాజరుపరిచి జ్యుడీషియల్‌ రిమాండ్‌కు తరలిస్తున్నారు. కేసు దర్యాప్తు కొనసాగుతోంది. భద్రతా కారణాల దృష్ట్యా ఫిర్యాదుదారుడి వివరాలను అధికారులు వెల్లడించలేదు.

లంచం అడిగితే ఫిర్యాదు చేయండి

ప్రభుత్వ ఉద్యోగి ఎవరైనా లంచం డిమాండ్‌ చేస్తే ఏసీబీ టోల్‌ఫ్రీ నంబర్‌ 1064కు ఫోన్‌ చేసి ఫిర్యాదు చేయాలని అధికారులు సూచించారు. తెలంగాణ ఏసీబీ వాట్సాప్‌ నంబర్‌ 9440446106 ద్వారా కూడా ఫిర్యాదు చేయవచ్చని తెలిపారు. ఫిర్యాదుదారుల వివరాలను గోప్యంగా ఉంచుతామని స్పష్టం చేశారు.