నారాయణఖేడ్ నియోజకవర్గంలో ఎస్సీ కార్పొరేషన్ ద్వారా మంజూరు చేసే రుణాలను రాజకీయ జోక్యం లేకుండా నిజమైన అర్హులైన లబ్ధిదారులకే అందించాలని కేవీపీఎస్ జిల్లా ఉపాధ్యక్షులు కొటారి నర్సింలు డిమాండ్ చేశారు. పేద, నిరుద్యోగ ఎస్సీ కుటుంబాలకు స్వయం ఉపాధి కల్పించేందుకు ప్రభుత్వం అందిస్తున్న రుణాలను రాజకీయ నాయకుల ఒత్తిళ్లు, సిఫారసులతో అర్హత లేని వారికి మంజూరు చేయడం వల్ల నిజమైన లబ్ధిదారులకు అన్యాయం జరుగుతుందని అన్నారు. అధికారులు ప్రభుత్వ నిబంధనల ప్రకారం పారదర్శకంగా లబ్ధిదారులను ఎంపిక చేసి, అర్హత ఉన్న ప్రతి ఒక్కరికీ సమాన అవకాశం కల్పించాలని కోరారు. రాజకీయ జోక్యంతో అర్హత లేని వారికి రుణాలు మంజూరు చేస్తే కేవీపీఎస్ ఆధ్వర్యంలో ఉద్యమాలను ఉధృతం చేస్తామని, అవసరమైతే మండల అభివృద్ధి కార్యాలయాలు, ఎస్సీ కార్పొరేషన్ కార్యాలయాలను ముట్టడిస్తామని నర్సింలు హెచ్చరించారు. వెంటనే అర్హులైన లబ్ధిదారులను గుర్తించి రుణాలు మంజూరు చేయాలని ఆయన డిమాండ్ చేశారు. ఈ కార్యక్రమంలో కేవీపీఎస్ జిల్లా నాయకులు ఎస్. గణపతి, తుకారాం తదితరులు పాల్గొన్నారు.