ఫిబ్రవరి 12న జరిగే దేశవ్యాప్త సమ్మెలో అంగన్వాడీ ఆయాలు, టీచర్లు, హెల్పర్లు పెద్ద సంఖ్యలో పాల్గొని సమ్మెను విజయవంతం చేయాలని సిఐటియు జిల్లా ఉపాధ్యక్షుడు నకిరేకంటి రాము, అంగన్వాడీ టీచర్స్ యూనియన్ మండల అధ్యక్షురాలు గట్టు లలిత పిలుపునిచ్చారు.సిఐటియు ఆధ్వర్యంలో స్థానిక సిడిపిఓ కార్యాలయంలో అధికారులకు సమ్మె నోటీసులు అందజేశారు. ఈ సందర్భంగా వారు మాట్లాడుతూ అంగన్వాడీ ఉద్యోగులు చేస్తున్న సేవలకు తగిన విధంగా కనీస వేతనం చెల్లించాలని డిమాండ్ చేశారు. కేంద్ర ప్రభుత్వం తీసుకువచ్చిన కార్మిక వ్యతిరేక చట్టాలను వెంటనే రద్దు చేయాలని కోరారు.స్కీమ్ వర్కర్లకు ఆరోగ్య భద్రత, ఉద్యోగ భద్రత కల్పించడంలో ప్రభుత్వాలు విఫలమయ్యాయని విమర్శించారు. ప్రభుత్వాల నిర్లక్ష్య వైఖరికి నిరసనగా ఫిబ్రవరి 12న జరిగే దేశవ్యాప్త సమ్మెలో అంగన్వాడీ ఉద్యోగులు ఐక్యంగా పాల్గొని తమ హక్కుల సాధన కోసం పోరాటం చేయాలని పిలుపునిచ్చారు.

ఈ కార్యక్రమంలో వర్కాల రేణుక, బోళ్ల కవిత, వంగాల మారయ్య తదితరులు పాల్గొన్నారు.