సంగారెడ్డి జిల్లా పోలీసు కార్యాలయం ప్రకటన ప్రకారం, ప్రజల భద్రతను కాపాడడం మరియు సురక్షిత ప్రయాణాన్ని ప్రోత్సహించడం ప్రధాన లక్ష్యంగా “అరైవ్ అలైవ్ – 2026” రోడ్డు భద్రతా వారోత్సవాలు జహీరాబాద్ పట్టణంలో ఘనంగా ప్రారంభించబడ్డాయి. ఈ సందర్భంగా ఆదర్శనగర్ కాలనీ, పస్తాపూర్ చౌరస్తాలలో ట్రాఫిక్ సిగ్నల్స్ ను జిల్లా పోలీసు అధికారి పరితోష్ పంకజ్ ప్రారంభించారు.అదనంగా, ఎస్.వి. ఫంక్షన్ హాల్‌లో ఏర్పాటు చేసిన మెగా కంటి పరీక్షా శిబిరాన్ని కూడా ప్రారంభించారు. ఈ శిబిరంలో ఆర్టీసీ బస్సులు, స్కూల్ బస్సులు, లారీలు, ఆటోలు నడిపే డ్రైవర్లకు కంటి చూపు తనిఖీ చేసి, లోపాలు ఉన్నవారికి ఉచితంగా కళ్లద్దాలు అందజేయబడుతున్నాయి.కచ్చితమైన కంటి చూపు ఉన్నవారే సురక్షితంగా వాహనాలు నడపగలరు.జిల్లా పోలీసు అధికారి మాట్లాడుతూ, వేగంగా అభివృద్ధి చెందుతున్న పట్టణాలలో ట్రాఫిక్ అధికంగా ఉండటంతో,ఆదర్శనగర్, పస్తాపూర్ చౌరస్తాలలో ట్రాఫిక్ సిగ్నల్స్ ఏర్పాటు చేశామని తెలిపారు.ప్రతి రోజు పాఠశాలలు, కాలేజీలు, కార్యాలయాలకు వెళ్లే ప్రయాణికులను సురక్షితంగా గమ్యస్థానాలకు చేరవేయడంలో డ్రైవర్ల పాత్ర కీలకమని పేర్కొన్నారు.డ్రైవర్లు వాహనాల కండిషన్‌ను తరచుగా తనిఖీ చేయాలని, మద్యం సేవించి వాహనాలు నడపరాదని, ట్రాఫిక్ నిబంధనలు తప్పనిసరిగా పాటించాలని హెచ్చరించారు.ట్రాఫిక్ నిబంధనలు పాటించడం ద్వారా మీరు మాత్రమే కాకుండా,మీ కుటుంబ సభ్యులు, ఇతర వాహనదారులు కూడా రక్షణ పొందుతారని సూచించారు.రోడ్డు ప్రమాదంలో కుటుంబ యజమానిని కోల్పోతే ఆ కుటుంబానికి ఎదురయ్యే కష్టాలను గుర్తు చేశారు.కార్యక్రమంలో జహీరాబాద్ డీఎస్పీ, ఇన్‌స్పెక్టర్లు, మున్సిపల్ చైర్మెన్, వైస్ చైర్మెన్, కమిషనర్, ఆర్.టి.సి డిపో మేనేజర్, మోటర్ వెహికిల్ ఇన్స్పెక్టర్, టౌన్ మరియు రూరల్ ఎస్ఐలు మరియు ఇతర సబ్-డివిజన్ పోలీసు అధికారులు పాల్గొన్నారు.ఈ కార్యక్రమం ద్వారా ప్రజలపై భద్రతా అవగాహన పెంపొందించడం, రోడ్డు ప్రమాదాల సంఖ్య తగ్గించడం, ట్రాఫిక్ నియమాల పాటింపు ద్వారా సమగ్ర రక్షణను కల్పించడం ప్రధాన లక్ష్యంగా తీసుకున్నారు.