జహీరాబాద్ నియోజకవర్గంలోని కోహీర్ మండలం పరిధిలో గురుజువాడ గ్రామంలో ఉన్న జిల్లా పరిషత్ ఉన్నత పాఠశాలలో గురువారం భావోద్వేగభరిత వాతావరణంలో అభినందన సభ జరిగింది.పాఠశాలలో జీవశాస్త్ర ఉపాధ్యాయునిగా సేవలందించిన బోగరి జిన్ రాజ్ పదవీ విరమణ సందర్భంగా ఈ కార్యక్రమాన్ని ఘనంగా నిర్వహించారు.దీర్ఘకాలం పాటు విద్యార్థులకు అంకితభావంతో బోధన చేసి, అనేక మంది విద్యార్థులను ఉన్నత స్థానాలకు చేర్చిన జిన్ రాజ్ సేవలను సభలో వక్తలు ప్రశంసించారు. క్రమశిక్షణ, సమయపాలన,విద్యార్థుల పట్ల మమకారం వంటి గుణాలతో ఆయన ఉపాధ్యాయ వృత్తికి ఆదర్శంగా నిలిచారని కొనియాడారు.ఈ కార్యక్రమంలో నేషనల్ హ్యూమన్ రైట్స్ సోషల్ జస్టిస్ సోషల్ సర్వీస్ ఫర్ చేంజ్ ఆఫ్ ఇండియా జిల్లా అధ్యక్షులు బైండ్ల కృష్ణ,జిల్లా ప్రధాన కార్యదర్శి శ్రీశైలం, జహీరాబాద్ విభాగ మహిళా రక్షణ అధ్యక్షురాలు సుమిత్ర, న్యాల్ కల మండల అధ్యక్షులు నవీన్ కుమార్ పాల్గొని జిన్ రాజ్‌ను శాలువాతో సన్మానించి శుభాకాంక్షలు తెలిపారు.వారి సేవలు సమాజానికి మరువలేనివని పేర్కొన్నారు.అలాగే మండల విద్యాశాఖాధికారి,వివిధ పాఠశాలల ప్రధానోపాధ్యాయులు, ఉపాధ్యాయుల బృందం, పాఠశాల విద్యార్థులు, పూర్వ విద్యార్థులు, గ్రామ పెద్దలు, గ్రామస్తులు, యువత పెద్ద సంఖ్యలో హాజరై ఆయనకు వీడ్కోలు పలికారు. పలువురు విద్యార్థులు మాట్లాడుతూ ఆయన బోధన శైలి తమ జీవితాల్లో మార్పు తీసుకువచ్చిందని గుర్తుచేసుకున్నారు.సాదాసీదా ఉపాధ్యాయుడిగా ప్రారంభమైన ఆయన ప్రయాణం, వేలాది మంది విద్యార్థుల మనసుల్లో చిరస్థాయిగా నిలిచే గురువుగా ముగిసిందని సభలో అభిప్రాయపడ్డారు. పదవీ విరమణ అనంతరం కూడా ఆయన సమాజ సేవలో కొనసాగాలని అందరూ ఆకాంక్షించారు.ఈ కార్యక్రమం గురుజువాడ గ్రామంలో ఉపాధ్యాయ వృత్తికి ఉన్న గౌరవాన్ని మరోసారి చాటిచెప్పింది.