నారాయణఖేడ్ పట్టణంలోని ఏరియా ఆసుపత్రిలో బుధవారం నిర్వహించిన ఆసుపత్రి అభివృద్ధి సొసైటీ సమావేశంలో నారాయణఖేడ్ శాసనసభ్యులు డాక్టర్ పట్లోళ్ల సంజీవరెడ్డి, మున్సిపల్ చైర్మన్ నగేష్ కుమార్ షేట్కార్ పాల్గొన్నారు. ఈ సందర్భంగా ఆసుపత్రిలో రోగులకు అందుతున్న వైద్య సేవలు, మౌలిక సదుపాయాలు, అందుబాటులో ఉన్న సౌకర్యాలపై అధికారులతో సమగ్ర సమీక్ష నిర్వహించారు. ప్రజలకు మెరుగైన ఉచిత వైద్యం అందించడమే ప్రభుత్వ లక్ష్యమని ఎమ్మెల్యే పేర్కొంటూ, ఆసుపత్రికి వచ్చే ప్రతి రోగికి ఎటువంటి ఇబ్బందులు కలగకుండా సేవలు అందించాలని వైద్య సిబ్బందిని ఆదేశించారు. మందుల సరఫరా సమృద్ధిగా ఉండేలా చూసుకోవడం, పారిశుధ్యాన్ని మెరుగుపరచడం, అవసరమైన ఆధునిక వైద్య పరికరాలను అందుబాటులో ఉంచడం వంటి అంశాలపై ప్రత్యేక దృష్టి సారించాలని సూచించారు. పెండింగ్‌లో ఉన్న పనులను త్వరితగతిన పూర్తి చేయాలని అధికారులకు దిశానిర్దేశం చేశారు.ప్రభుత్వ ఆసుపత్రులపై పేద ప్రజలకు ఉన్న నమ్మకాన్ని నిలబెట్టుకోవడం వైద్యుల బాధ్యత అని పేర్కొంటూ, డాక్టర్లు మరియు సిబ్బంది సమయపాలన పాటిస్తూ నిబద్ధతతో పనిచేయాలని స్పష్టం చేశారు. ఆసుపత్రి అభివృద్ధి సొసైటీ నిధులను నిబంధనల ప్రకారం వినియోగించి అత్యవసర సేవలను మెరుగుపరచాలని తెలిపారు. అలాగే మహిళల్లో గర్భాశయ క్యాన్సర్ నివారణలో హెచ్‌పీవీ వ్యాక్సిన్ కీలకమని వివరిస్తూ, 9 నుండి 14 సంవత్సరాల మధ్య వయస్సు గల బాలికలకు ఈ టీకా అందించడం ద్వారా భవిష్యత్తులో క్యాన్సర్ ముప్పును తగ్గించవచ్చని చెప్పారు. ఈ టీకాపై ప్రజల్లో అవగాహన పెంచి అర్హులైన ప్రతి బాలికకు అందేలా చర్యలు తీసుకోవాలని వైద్య సిబ్బందికి సూచించారు. ఈ కార్యక్రమంలో ఆసుపత్రి సూపరింటెండెంట్ రమేష్, వైద్యులు, కమిటీ సభ్యులు, మున్సిపల్ కౌన్సిలర్లు, ఇతర ప్రజా ప్రతినిధులు పాల్గొన్నారు.