నార్కట్ పల్లి పట్టణ కేంద్రంలో అరుదైన సంఘటన స్థానికులను ఆశ్చర్యానికి గురిచేసింది. సాధారణంగా ఒకదానికొకటి దూరంగా ఉండే కుక్క, కోతి మధ్య ఏర్పడిన స్నేహం ప్రస్తుతం పట్టణంలో చర్చనీయాంశంగా మారింది.పట్టణంలోని ప్రధాన వీధి సమీపంలో గత కొన్ని రోజులుగా ఒక కోతి, ఒక వీధికుక్క కలిసి తిరుగుతూ కనిపిస్తున్నాయి. ఆహారం కోసం వెతుకుతూ, ఒకదానికొకటి దగ్గరగా కూర్చుని తినడం, విశ్రాంతి తీసుకోవడం వంటి దృశ్యాలు ప్రజలను ఆకట్టుకుంటున్నాయి. కోతి చెట్టు పైకి ఎక్కినప్పుడు కుక్క చెట్టు కింద కాపలా కాస్తూ ఉండటం, కుక్కకు ఎవరైనా దగ్గరయ్యే ప్రయత్నం చేస్తే కోతి గట్టిగా అరుస్తూ హెచ్చరించడం వంటి సంఘటనలు అక్కడి వ్యాపారులు గమనించారు.స్థానిక వ్యాపారి చెబుతూ,“మొదటవీటిద్దరూతగువులాడతాయని అనుకున్నాం. కానీ ఇప్పుడు విడదీయరాని స్నేహితుల్లా మారిపోయాయి. ఉదయం నుండి సాయంత్రం వరకు కలిసి తిరుగుతున్నాయి” అని తెలిపారు.పిల్లలు, పెద్దలు ఈ అరుదైన దృశ్యాన్ని తమ మొబైల్ ఫోన్లలో చిత్రీకరిస్తూ సామాజిక మాధ్యమాల్లో పంచుకుంటున్నారు. కొన్ని సందర్భాల్లో కోతి కుక్కపై ప్రేమగా చేతులు వేసి నిమురడం చూసి పలువురు ఆశ్చర్యం వ్యక్తం చేశారు.జంతువుల మధ్య ఇలాంటి మైత్రి సహజసిద్ధంగా ఏర్పడడం అరుదైన విషయం అని స్థానికులు అభిప్రాయపడుతున్నారు. ప్రకృతిలో సహజ శత్రువులుగా భావించే జంతువుల మధ్య కూడా స్నేహం ఎలా పెరుగుతుందో నార్కట్పల్లిలో కనిపిస్తున్న ఈ సంఘటన స్పష్టంచేస్తోందని వారు వ్యాఖ్యానిస్తున్నారు.

ప్రస్తుతం ఈ కుక్క–కోతి జంట పట్టణ ప్రజలకు ఆకర్షణగా మారింది. అధికారులు జంతువులకు ఎలాంటి ఇబ్బంది కలగకుండా జాగ్రత్తలు తీసుకోవాలని స్థానికులు కోరుతున్నారు.