చిట్యాల: నల్గొండ జిల్లా చిట్యాల మున్సిపాలిటీ పరిధిలో కురిసిన భారీ వర్షం, ఈదురుగాలుల కారణంగా రెండో వార్డులోని ఓ భారీ వేపచెట్టు నేలకొరిగి షేక్ గౌస్మియా ఇంటిపై పడింది. చెట్టు కొమ్మలు ఇంటి నిర్మాణంపై విరిగిపడటంతో స్థానికులు ఆందోళనకు గురయ్యారు.ఘటన విషయం తెలుసుకున్న వెంటనే రెండో వార్డు కౌన్సిలర్ షేక్ షబానా అజీమ్ స్పందించి ఘటనాస్థలానికి చేరుకున్నారు. స్థానికుల సహకారంతో ఇంటిపై పడిన భారీ చెట్టు కొమ్మలను తొలగించే చర్యలను స్వయంగా పర్యవేక్షించారు. ప్రమాదం మరింత పెరగకుండా జాగ్రత్తలు తీసుకుంటూ బాధిత కుటుంబానికి ధైర్యం చెప్పారు.

ప్రతికూల వాతావరణ పరిస్థితుల్లో ప్రజలకు అండగా నిలిచి, ఎలాంటి ఆలస్యం చేయకుండా సహాయక చర్యలు చేపట్టిన కౌన్సిలర్ షబానా అజీమ్ సేవలను స్థానికులు అభినందించారు. ప్రజా సమస్యల పరిష్కారంలో ఎప్పుడూ ముందుండే నాయకత్వాన్ని మరోసారి చాటుకున్నారని వార్డు వాసులు పేర్కొన్నారు."ప్రజలకు అవసరం వచ్చిన ప్రతిసారి అందుబాటులో ఉంటూ సేవ చేయడమే నా బాధ్యత" అని ఈ సందర్భంగా కౌన్సిలర్ షేక్ షబానా అజీమ్ తెలిపారు. భారీ వర్షాలు, ఈదురుగాలుల సమయంలో ప్రజలు అప్రమత్తంగా ఉండాలని ఆమె సూచించారు.