నల్గొండ

రాష్ట్రంలో ఖాళీగా ఉన్న సుమారు 19 వేల పోలీస్ ఉద్యోగాలను వెంటనే భర్తీ చేయాలని, పోలీస్ నియామకాలకు వయోపరిమితి పెంచాలని డిమాండ్ చేస్తూ డీవైఎఫ్‌ఐ ఆధ్వర్యంలో గురువారం నల్గొండ జిల్లా కేంద్ర గ్రంథాలయం వద్ద సంతకాల సేకరణ కార్యక్రమం నిర్వహించారు.

ఈ సందర్భంగా డీవైఎఫ్‌ఐ రాష్ట్ర ఉపాధ్యక్షుడు మల్లం మహేష్ మాట్లాడుతూ, పోలీస్ శాఖలో భారీ సంఖ్యలో ఖాళీలు ఉన్నప్పటికీ ప్రభుత్వం నియామక ప్రక్రియ చేపట్టకపోవడం వల్ల నిరుద్యోగ యువత తీవ్ర నిరాశకు గురవుతోందన్నారు. పోలీస్ ఉద్యోగాల కోసం ఎన్నో సంవత్సరాలుగా శ్రమిస్తున్న వేలాది మంది యువతీ, యువకులు నియామకాల జాప్యం కారణంగా వయోపరిమితి దాటిపోతున్నారని ఆందోళన వ్యక్తం చేశారు.

ప్రభుత్వం తక్షణమే పోలీస్ నియామకాలకు నోటిఫికేషన్ విడుదల చేసి ఖాళీలను భర్తీ చేయాలని, అభ్యర్థులకు వయోపరిమితిని 40 సంవత్సరాలకు పెంచాలని, లాంగ్ జంప్ అర్హతను 3.8 మీటర్లుగా నిర్ణయించాలని డిమాండ్ చేశారు.

సంతకాల సేకరణ కార్యక్రమానికి విద్యార్థులు, నిరుద్యోగ యువత పెద్ద ఎత్తున పాల్గొని మద్దతు తెలిపారు.

ఈ కార్యక్రమంలో డీవైఎఫ్‌ఐ జిల్లా సహాయ కార్యదర్శి కట్ట లింగస్వామి, జిల్లా ఉపాధ్యక్షుడు గుండాల నరేష్, నాయకులు మాదాసు రావణ్, బొమ్మనబోయిన రాజు, కొంగల ప్రసాద్, మల్లం రోహిత్, అదిమల్లా భగత్, శ్రీకాంత్, శివ, అనిల్, రాము, అశోక్, హరీష్, ప్రశాంతి, రాజేశ్వరి తదితరులు పాల్గొన్నారు.